Vâwrsèla-pa

August 20th, 2009 10:16 am by chawnghilh

Vâwrsèlapa hi pa huaisen leh pa hrohràng na tak mai hi a ni a. Kum khat chu an khuain ramhuai tamna ram lo atân an nei pek a. Ramhuaiho chu an hlauh èm avàngin tumah ramah an riak trha ngam trhìn lo va. Vâwrsèlapa chauh chu a riak ngam thìn a.

Zànah te hian Vâwrsèlapa chu ramhuaiho chuan an tihtrhaih trhìn a. An lo ràlahte chuan lo vàt ve ni àwm tak te hian thing leh maute chu an sàt tlu ruih ruih reng a, ‘An lo vùt chuan an vàt nasa àwm mang e,’ tih mai tùrin thàwm an nei nasa a. A châng phei chuan an kûk rui rui a, ‘Hei ha, hui ha’ te hi ring fê fêin an ti trhìn a, a tùk khua a lo vàr chuan engmah hmuh tùr hi a awm ngai leh lèm hlei lo va.

Vâwrsèlapa chuan a lo vauvah pìpû a suih a, ramhuaiho chu an uai trhìn a. Ramhuaiho pipu uai chuan, pipu uai hla-ah, “Vâwrsèlapa zang bawng,” an ti trhìn a. Vâwrsèlapa’n a lo hriat chuan a tithei dèr lo va, ramhuaiho chu a ùm chiam trhìn a, a man theihte chu a vaw hrep trhìn a. Ramhuaiho chuan tlànchhe pahin, “Vâwrsèlapa zang bawng,” an ti a, Vâwrsèlapa’n a ùm phàka a man dâwn meuh chuan, “Vâwrsèlapa zang bawng,” an tih chu —rang fa hranin “Bawng leh lo, bawng leh lo,” an ti a. Vâwrsèlapa chu a thin a ur hle trhìn a. Ramhuaiho chu a ùm darh leh chiam mai trhìn a ni.

Vawi khat chu, a pìpù suih ramhuaihovin uai nân leh amah chhaih nân taka an hman thin avàngin Vâwrsèlapa chuan pìpû chu a suih trha a. Ramhuaiho pîpû uai inthèn sàn lai taka chat hàwm tùrin a siam a. Ramhuaiho chuan hre hek lo, a hmà ang tùr emaw tiin an han uai leh ta a, an han inthèn leh ta dàrh dàrh a, an inthèn pah chuan, “Vâwrsèlapa” an han ti leh tran chauhva, an inthèn sàn lai takin pìpù-hrui chu a chat a. Mawng sawh dàwtin an tla thum ta tràwk a, a trhen phei chuan an ngùmte an sawh a, an nui uar uar a.

Vawi khat chu Vâwrsèlapâ ramriak chuan mai a chhùm a, ramhuaiho chuan an ei ve chàk ta hle mai a, “Vâwrsèl, engnge i chhum à?” an rawn ti a. Vâwrsèlapa chuan, “Mai,” a lo ti a. Ramhuaiho chu an lo kal hnai a, “Vâwrsèlapa, i mai chhum chu a hmin tawh em?” an rawn ti leh a. Vâwrsèlapa chuan aw dam dap hian, “La hmin lo,” a lo ti a. Ramhuaiho chu an lo kal khàwm zèl a, thlâm chhûngah te chuan an rawn lùt a. A trhen, thlâm chhuatlaiah an trhû a, a trhen thlâm nàmthlàkah, a trhen kawngka biangah te —hmun hran hranah an trhu ther fer fur a.

A khât tàwkin, “Vâwrsèlapa, I mai chhum chu a hmin tawh em?” an ti leh thìn a. Vâwrsèlapa chuan trha takin, “La hmin lo,” a ti mai a. Ramhuaiho chu an tam èm avàngin an thlâte pawh chu a muang hlawm hle a. A trhen chuan an lûte an thlawn a, an bân leh bawp thlawn tàwk te pawh an lo awm bawk a. Bawp leh bawpte an insualtîr vèl a. An ri ham ham reng a.

A khât tàwkin, “Vâwrsèlapa, I mai chhum chu a hmin tawh em?” an ti leh thìn a. Vâwrsèlapa chuan a ning ve ta deuh a, a hmai bul sèta ngeiawm fahran a, “I mai chhum chu a hmin tawh em?” rawn ti deuh rengtu chu a man-lawk a, “La hmin lo … tih pawha …” tih leh, bang thlang den nâna hman chu a rual ta mai a. Ramhuai dang pawh chu man tumin a ùm ta hlawm a. Ramhuaiho hlau chu —bak lêngin an tlànchhia a. An lu te, bân te, bawpte an lo thlawn hlawm avàng khàn vuah trha leh hman hlawm hek lo —lu bung te, bân bùl te, bawp bàltein an tlànchhe ta ngàwk ngàwk hlawm a.

Nakìnah chuan, ramhuaiho chu an rawn kal leh thàm thàm a, “Vâwrsèlapa, I mi tih dànah kan lungawi lo, kan Hmaidungseia kan rawn thawh dâwn e,” an rawn ti a. Vâwrsèlapa chuan, “Nangnî Hmaidungseia leh sei lova ka hre lo ve. In duh leh rawn thawh rawh u …. sek’sek a,” a lo tihsan mai a.
‘Vâwrsèlapa zang bawng,’ ti lauh lauh chungin an tlàn darh leh ta ham ham a. Vâwrsèlapa chuan, “E.. e.. e.. chutì tea mi’n han tih chu le,” tih pahin —ramhuaiho tlàn darh ar ar chu a sairawkherhin a perh zui a. A trhen chu an lu-ah te, bengah te, hnungzângahte a perh fuh a. Intuai nawk nawk chungin, “Bawng leh lo, bawng leh lo,” an ti leh nak nak a.

Ramhuaiho chuan an lalpa —Hmaidungseia chuan an rawn pun ta a. Hmaidungseia ho chuan an rawn kal a. An rawn pàwr hlawm hle bawk a. Ngampa takin thlâm chhuatahte chuan an rawn tei kual leh ta hlawm a. “Vâwrsèlapa, kan lalpa Hmaidungseia kan rawn hruai a nia àw,” an ti a. Vâwrsèlapa chuan, “Nangnî Hmaidungseia leh sei lova —eng vakah mah ka ngai lo ve,” a lo tihsan mai a. Hmaidungseia chu thlâm kawngkâah chuan a rawn dàk ta ho mai a, a hmai dung chu a sei èm avàngin thlâm kawngkâah chuan a khat vek a. “Vâwrsèlapa, I mai chhum chu a hmin tawh em?” a rawn ti thùm ta chher chher mai a.

Vâwrsèlapa chuan, hlau hlek lo hian, “La hmin lo,” tiin, trha deuhvin a lo chhâng mai a. A khât tàwka a zawhsèk avàngin Vâwrsèlapâ thin chuan a tuar leh ta lo va, “La hmin lo, tih pawha …” tih leh Hmaidungseia hmaiah chuan a mai chhum chuan a theh ta thut mai a! Hmaidungseia nâ tì chu tap truau chungin a tlànchhe ta a. A hmai chu a sat èm avàngin a tuai vak vak a, a tuai pilh ta phung mai a. A hmai dung a sei teh rèng nèn hmai alawi pawh a nei ta lo va. An lalpa Hmaidungseia meuh pawhin a ngam loh avàngin ramhuaiho chuan Vâwrsèlapa chu an tibuai zui ngam ta lo va.
(February 15, 2005 Zofa Rûn)

He thawnthu hi ninhleia thil ka thlìr kual vèlna lamah a lo inkimkual vei rèm a, ka vawikhat chhiarna a ni nghe nghe a. Tuma chhiar hlawh vak lova a inkimkual mai mai ai chuan tiin, ka rawn pir chhuak ve ta mai a ni e; punctuation erawh hi chu ka siamtha nual..

Similar Posts:

Recent Posts:

30 Responses to “Vâwrsèla-pa”

  1. 1
    XaiA Says:

    Vawrsela pa chanchin hi duhna deuh ka nei a,a chhan chu kan pi leh pu ten ramhuai an hlauh em em lai a hlaulo tur a inzirtirna thawnthu tha tak a nih vang leh,a hlauhawmlo zawng chang ni lo a a hlimthlak zawng a phuah chhuah a nih vang hi a ni.

    Bawng,…bawng leh lo.. tih vel phei hi chu tunlai politics a in demna au hla ber a nih nghe nghe hi :lol:

    Report this comment

  2. 2
    samuelapa Says:

    Pu Chawngchilha chu a rawn pir chhuak tha hle mai. Xaia sawi ang hian “B…, B leh lo’ tih hi chu kan politician ho thusawi rintlak lohzia sawi nan hman a ni ta ber awm e…

    Report this comment

  3. 3
    Kawnga Says:

    Va han tha kher em! Ngaihnawm ka ti lutuk. Mahni theih ang angin han ti zel teh u, midang pawhin. Mizo thawnthu soft copy kan nei tam sawt khawp a nia, thangtharte kan rochun loh chuan an tham ral mai ang.

    Good work! Tv Chawnghilh..

    Report this comment

  4. 4
    chhangte_ll Says:

    Tumkhat pawh thlamah a inkhuh hlun a, phungrual ho kha an rawn lut ham ham a. An ninhlei pangai taka ninhlei ta chu chitlang hi an hmufuh hlauh mai a (Rock Salt ani chek ang chu). ‘Hei hi eng ni’ tiin an inrin siak nak nak a, a thenin ‘Pum-al’ anih hi ‘Pum-al’ an ti a. Vawrselapa ning tawngkhawng chuan ‘Chi anih kha chi’ a ti thum hluta. Phungrual hlau thlabar khan tlanchhiat pahin ‘Vawrselapa zang bawng’ an ti leh ham ham, mahse phungpui pakhat a umpha a, a man hlauh mai a. ‘A bawng emi’ ti a a zawh in, phungpui nu hlau lutuk khan ‘Bawng leh lo’ tih aiah ‘Bawng het hut, bawng het hut’ a ti ani awma. A thinrimin kha phungpuinu kha a that a, chuan a ril kha a chhum ta hlat hlat a. Hawkdak ta ngang phungrual chuan ‘Vawrselapa, enge i chhum’ tiin an zawt leh dak dak a, ani lah chuan a lo eitir mai ani awma. Hlim tak leh puar taka thuife thlam atanga an awm ta maw tih veleh Vawrselapa chuan ‘Mahni thiante ril ei ah’ tiin a au ta zauh a. ‘Aa, chu Vawrselapa’n enge a sawi’ tiin an ngaichang deuh thapa, anih lah chuan ‘A tlar hnung/a laita/ a sir kal kha a chawn/a hmel/a sam tha ka ti’ ti mai maiin a chhaih kual vela. Mahse a hnuah a thilsawi kha an hrechiang ta a, Hmaidungseia hi an pun ta zawk ani lawmi – Naupanlai zan mutdawna min hrilhdan leh Ka la hriat reng dan :)

    Report this comment

  5. 5
    Kawnga Says:

    Chhangte, i ti tha lutuk. Hriat dan a inang lo tur a ni reng a ni. I rawn ti hlu leh ta sawt mai.

    Report this comment

  6. 6
    ruggers2009 Says:

    heti em em chu a bawng ngang aniang…a thohtupa nen hian….nih loh pui huat thu awm suh ei….

    Report this comment

  7. 7
    zuala12 Says:

    chawnghilh thawnthu(thanthu ni lovin) chu a lunglen thlak hle mai.Kan naupan laiin ka pa in zan mut dawnah min hrilh thin a,ngaihnawm ti bawksi,ramhuai chanchin te a tel ve bawk vanga hlau deuh siin kan ngaithla thap thin.Heng mizo thawnthu hlui ngaihnawm tak tak te hi in rawn post leh hlauh thin a,thinlai mu hnu a kai tho thin lung a leng vawng vawng e,rawn zawng chhang zel teh u a manhla ee mai.

    Report this comment

  8. 8
    mzvision Says:

    Ngaihnawm of the year ah ka puang tops kei misual hian

    Report this comment

  9. 9
    rotekawlasepa Says:

    Chhangte… i rawn sawi khi chu Lengkawia thawnthu ani zawk lo maw?

    Report this comment

  10. 10
    Irreplaceable Says:

    Vawrsela-pa hi ani lawm ni mai lum kha?

    A ngaihnawm khawp mai,hei ha hui ha!

    Report this comment

  11. 11
    Mack Daddy Says:

    @ Irre: Thangsira pa’n mai a lum e…. lawm

    Report this comment

  12. 12
    Jacka Pi Says:

    Rairahtea thawnthu a bul atanga a tawp thleng hrechhuak kan la awm em le?? mizo thawnthu ah chuan a sei ber pawl ni vein ka hria,Lalruanga thawnthu nen hian….Irre chu va han hresual chiang velee

    Report this comment

  13. 13
    Mack Daddy Says:

    Rahte rahte lo haw rawh…..

    Report this comment

  14. 14
    Irreplaceable Says:

    Heih, lal Vikinga ka va ang ta ve! :)

    Pa tih lai khi chu ka chiang a,tu pa nge ka hre lo lawm,thanks Mack Daddy.

    Report this comment

  15. 15
    H.Vangchhia Says:

    Heti em em chipchiar hian ka lo hre miah lo/tawh lo tih min ti hrechhuak. Lawmawme :)

    Report this comment

  16. 16
    Kawnga Says:

    Rairahtea leh Lalruanga chu remchangah ka la rawn post dawn nia… in tui ve tan dawn a ang. Ka lawm

    Report this comment

  17. 17
    North-Man56 Says:

    @irreplaceable, Thangsirapa mawle mai lum chu.
    Chuan Bawng…Bawng lehlo tih vel hi chu kan ram politics boruak nen hian a inhmeh lutuk ka ti kei pawh. Chuan avan lawmawm em, he thawnthu i rawn post hi. Kan naupang ve lai khan ka nuin min hrilh thin asin. A lunglen thlak lutuk.

    Report this comment

  18. 18
    chawnghilh Says:

    Kan politician-te au-hla leh ramhuai-ho au-hla a thuhmun vek e, in tihna chu a ni lo’ng maw?

    Report this comment

  19. 19
    Rc Hmar Says:

    THA lutuk…mahse mizo tawng ziah dan TRHA tak chu ani lem lo…ka ngaihdanah chuan! Mizo tawng ziah dan pangngaia ziah ni thei se tha viau zawk lo maw…inthlahrung takin ka rawn comment e…

    Report this comment

  20. 20
    chawnghilh Says:

    @RC Hmar : Loh theih lohvin mi tihdan angin ka rawn hmang ve a nih hi —THA leh TRHA tih chungchangah hi chuan … VNT Font emaw Samcom emaw han hman mai Misual.com-ah ka thiam si lo va.

    THA tih pawh hi ‘ good or muscle’ emaw tihpalh a awl chang a awm thei ve si a! Tr hman kawp hi hmang chawk an awm ve a. Kei pawhin tr hman hi ka ei lo khawp. A ngaih chang a awm miau si a.

    Report this comment

  21. 21
    Born Spektator Says:

    Thil ka lo notice kan sawi ve lok. Kan mizo thawnthu hlui ah po ZAHMAWH rawngkai hi alo tel ve reng mai.

    Report this comment

  22. 22
    chhimkunpa Says:

    Bawng leh bawng leh lo…. nuai 1 sem dawn, sem leh dawn lo….

    Report this comment

  23. 23
    Bawngkuaivuna Says:

    Hei, min rel e mi?..

    Report this comment

  24. 24
    chawnghilh Says:

    Pu Dahrawka (Vet) khàn Mizo Thawnthu Bu a siam tha khawp. Tin, C. Vànlallàwma —Hrângbàna College-a Philosophy zirtîrtu pawh khàn “Hmànlai hian maw’m!” a siam tlatin ka hria … a hnuaia ka chaw-chhum bêl hi C. Vànlallàwma nupui Hruaiteii chaw chhumna bêl a ni nghe nghe a, he lamah ka lo rochung a nih hi!

    Hruaiteii pawh Làwma nèna hlim taka an in thar sak a hrùk faina lamah a chesual a, an kawmthlang luikawrah a tleng thla chiam a … kan inko kìr zo ta lo a nih kha …

    http://img188.imageshack.us/im.....001zju.jpg

    Report this comment

  25. 25
    chawnghilh Says:

    http://www.zoin.info/ -ah hian Mizo thawnthu a awm nual, Australia lama kan unaute thil tih a ni, a chhuanawm riau!

    Report this comment

  26. 26
    maawmi Says:

    Vawrselapa hi kan ram CM ni se, a huaisen dawn nasa mai sia; kan ram chu a nuam ngawt ang.

    Report this comment

  27. 27
    maawmi Says:

    chawnghilh @ Pi Hruaitei hi Civil Hospital-a sister kha a ni em? A thihlai vel khan damdawi inah ka awma ka hre ve. Khawngaihthlak khawp mai.

    Report this comment

  28. 28
    sillyBoy Says:

    Chawnghilha sawi lan taka zarah chuan Pu C. Vanlallawma hi kan lecturer thin a nia, pa ril zet mai a ni. An sawi dan chuan Upa Pawl member a nih hma hauhvin Upa pawl te pawhin Sr. Adviser atan an dah an ti!!

    Report this comment

  29. 29
    Oremsang Says:

    “Vawrselapa zang bawng,bawng leh khai a uai nulh nulh” ti in apa chuan min hrilh trin

    Report this comment

  30. 30
    Mizo Thawnthu List Directory - All Mizo Says:

    […] Vawrselapa […]

    Report this comment

Leave a Reply

You must be logged in to post a comment.