Thengreng

July 31st, 2009 1:01 am by chhana

A sermon ki takin, tuna kan thupui ‘Thengreng’ tih hi thenkhat chuan “Vanlawt” an tia. Middle School kan kal laiin kan Headmaster Pu S Vanlalhmuaka (Aman a sawi danin a hming bula ‘S’ hi Department pakhata Director chuan ‘Sailo’ tihna emaw tiin a hnam puiah a lo ngaia, a lo duhsak ngawt a ni awm e.

Sailo tihna ni lovin a sap hming ‘Samuel’ tih lamtawi a lo ni reng si. A hnam chu Khawlhring a ni.) chuan ‘Thengreng’ tia a lehlin avangin ka ti thengreng ve ta ngawt mai. Naupan laia zirtirtute thusawi kan hriat rei theih dan leh an thu kan rin zia hi.

Mizo writer lar tak Lalhmingliana Saiawi chuan, “Sap hovin an tihdan, ‘Universe’ tih hi khawvel tawng lar a ni tawh. Mizo hming kan lo phuah hran ve a ngai lo. Chu chang ni lovin a tha lo zawk. Hetiang khawvel thu lar sa hi zawng i thlak lul suh ang u,” a tia. Mahse kei chuan Mizote hi hnam thanglai kan nih avang leh kan tawng tih hmasawn zel ngai kan la nih avangin a theih chin chinah Mizo tawnga lehlin zel hi kan tum tur niin ka hria.

Van boruak zau em em, a lenzia leh a thukzia pawh kan hriat phak hauh loh khi; Discovery te an kah chhuahna, Arsi chhiarsen lohte awmna hmun,a bul leh a tawp pawh kan hriat phak loh hmun (space)  Solar System, Constellation leh Galaxy awmna hmun zau lutuk hi thengreng kan tih tak bera chu a ni.

Mahse thengreng tih hi mi tamtak chuan tiang hian an hrilhfiah hlauh thung: Pu James Dokhuma tawng Un hrilhfiahna 1st. Edition 1987 p.333-naah hetiangin Thengreng awmzia entir nan Sentence a siam a, “Hetiang ram Thengrengah engmah va tha suh,” tiin.

Pu P.L.C.Lallawmkima’n Pu Hrangliankunga kum 92 mi, Thengreng awmzia a zawt a, a chhanna chu, “Thengreng te chu hmun te tham enga maha hman tlak vak loh pawimawhna nei tham lo hi a ni e,” tih hi a ni a. Pu PLC Lallawmkima’n Mizoram Science Journal 1995 June thlaah, “Arsi Hrangchhuana awmna Van thengreng” tia an ziak mai chuan Padma Shree Pu R. Vanlawma (Zalen Cabin) beng chu a verh sat mai a. Pu R. Vanlawma’n hetiang hian a han sawi a. “Van Thengreng zau tak mai han tih nen chuan a inhmeh lo a ni.

Mizo pate chuan an lo neih tur an sawi hun laite chuan Thengreng hi an sawi fo a. A Thengreng laite pawh ka vat tel maithei a ni te an ti thin,” a ti a. Pu R. Vanlawma vek chuan, “Thengreng te chu kilkhawr hmun chep tih a ni a, a inhmeh lo lu lai em a. Boruak zau ti mai ila a dik tawk mai lawm ni?” tiin MSJ June 1995-ah a ziak a ni.

Tin, Mizo pa kum 80 ralkai tawh mi palite chuan tiang hian an sawi bawk:
“Mizo fate chu ram tuka lo nei mi, ram leilung thaa ei zawng mi kan ni a. Lo atana kan neih tur kan en te hian ram leilung thain min daih lo fo a. Ram chhengchhia tha lo laite kan pawm tel hian, a Thengreng lai te pawh kha lo atan kan han pawm tel ta mai te kan ti thin alawm,” an ti.
Heng upa ho hian ‘Vanlawt’ an ti zawk tlangpui a ni.

Hetiang teh nuaih hi thil awm dan ni mahse Sir Hmuaka sawi kha ‘O ni mah se au ka ti thau thau’ tih ang deuh khan thengreng ka ti tho tho.

Similar Posts:

Recent Posts:

14 Responses to “Thengreng”

  1. 1
    virthli Says:

    Ka hriat sualloh chuan, Pu C Rokhuma ( a hming hi ka sawi dik ang chu maw ) Israel tran em em tu leh Israel, Millitary lama an chet thratna hrang hrang chanchin te thiam tak leh chhiar ngaihnawm em ema lehkhabua ziak thrin tu pawhin, Pu Lallawmkima hman dan ang hrul khian “thengreng” tih tawngkam hi a hmang ve thungin ka hria. Trawng chitin hian ( Mizo trawng te leh English te pawh tiamin ) thumal (word) pakhat hian a hmanna context a zirin awmze hrang hrang a nei thei ani tih chu kan hre threuh awm e. Mizo lo hmun lam pang sawina context ah chuan “thengreng” chu “kilkhawr hmun chep” sawina chu a dikah pawh lo pawm ta ila, Space lampang sawina context ah awmze hrang pawh chu lo neih tir ta ila a sual em emna hran a awm chuang emaw ni le ??? Pu C Rokhuma ten trawngkam mawi tak maia an han hman chuan a inhmeh ve thlup tho mai.

    Report this comment

  2. 2
    Ruga Says:

    UFO ho te poh hi van thengreng atanga lokal an ni lawm ni. Van thengreng chu hla tak, hring mi te tloh poh phak loh hriat phak loh ram soina emaw ka ti maiah.
    Tlawrh!

    Report this comment

  3. 3
    Ruga Says:

    Universe lehlin nan chuan hmang lul lo ang u, thengreng nula tih chuan an nalh loh hmel e mai…(miss world). Kan tong ang a kan sengluh tamtak hi kan tawng tihausatu an nia.
    Tuman an zawm chuang ka ring lo.

    Report this comment

  4. 4
    mzvision Says:

    Van=Sky (for earth)
    Universe=Iunivarse
    Thengreng=Wasteland

    tita ila in helh viau em?

    Report this comment

  5. 5
    Alejendro Says:

    Van thengreng an ti deuh kher thin in ka hria van lam sawinan an hman chuan, van san tak sawinaah ka lo ngai ve ngawt a. Chuan hmun thengreng an tih hi chuan hmum pilril/kilkhawr tuma tlawhpawh vak lohna ni tur ah ka lo ngai ve ngawt a.

    Report this comment

  6. 6
    Veepee Says:

    Pu C.Rokhuma pawh ni raw sek sek.. tawngkam a hman dik loh chuan a hmang dik lo tih pawm ila ni mai. Van leh lo context ani emaw thengreng chu thumal pakhat awmze nei a ni a. Noun pawh a ni lo, Adjective a ni zawk awm e kan thu han chhiar khian. Heta van zawm nana thengreng an hman chhan pawh a adjective nihna vang tho a nia. A hmang tan tuten a awmzia dik tak an thelh a ni mai. Tawngkam dik hlel deuh pawmzam mai hi chu i ching lo hram teh ang u ka ti kei misual pachhe dulkiar ve satliah mi dum awmna pawh tluk lo hian…. tu hnam mahin an chin ka ring lo..Pem khawm ram tih loh chuan.. :(

    Report this comment

  7. 7
    virthli Says:

    Thumal pakhat Adjective a hman chuan, context dangah pawh adjective bawkin hman tur i tihna emawni pu VEEPEE. Mizo trawnga “BAN” tih hi, context hrang hrangah Noun, Adjective, Verb tein kan hmang bawk. Saptrawng Dictionary te pawh i keu chuan vawikhat “noun” anih tawh chuan hmun dangah pawh “noun” char char a hman tur an ti lem bik lo.

    Report this comment

  8. 8
    bawmrang Says:

    Keimahah chuan “vanthengreng” tihah ka nghet tlat.Aizawl a ka awm chhung zawngin chanchinbuah pawh “vanthengreng” tih vekin ka chhiar trhin.chuan…van leh thengreng hi an ziah zawm trhinin ka hria.

    Report this comment

  9. 9
    muantea Says:

    Ka hriat ve dan chuan thengreng tih chu hmun kilkhawr sawina a ni ngei mai. Mahse Veepee sawi anga adjective a kan hmang dawn a nih chuan noun nen kan ziak zawm thei lova, ‘van thengreng’ tih ‘van kilkhawr’ tihna maiah ka ngai a. Amaherawhchu, @bawmrang sawi ang a noun a hmanga kan ziak zawm a nih chuan Vanthengreng tih pawh chu van boruak zau tak tih nan a hman theih loh nachhan tur a awm lem lovin ka hria.Proper noun hi phel hrana awmze dik neihtir kher a tul lo thin.

    Report this comment

  10. 10
    Veepee Says:

    Ka han sawi tum zawk tak chu thengreng tih tawngkam hi kan thupui ziak tupa in felfai takin a awmzia a rawn sawi tawh ni ah ka ngai a… chuvang chuan universe leh nan chuan a hman chi lovang a ka ti mai a nia.
    Tin Pu bawmrang a rawn sawi noun context hrana adjective, verb te a hman i tih khi a dik tehreng mai. Mahse a bulthum a nihna (noun anih a a awmzia) kha adjective, verb a hman anih pawhin a danglam chuang lo turah ka ngai. ‘BAN’ i han sawi pawh khi a awmzia tak han sawi tella tha tur(Mizo tawng hi chu tonal language tih takah a awmzia sawi tel deuh kher loh hi chuan hriat a har thin.
    Entirna.. rush hour 2 kha in en tawh ngei anga Chris tucker a ka (mouth) kha a tawng tam lutuk avangin 7/11 in an tehkhin a ni (amah deu nan). 7/11 chu enge kan tih chuan ka hriat sual loh chuan a noun ah chuan dawr hmun inhawng reng a niin ka hria. Chuan an deuna tawngkam a 7/11 kha chu adverb/ adjective ani ta daih a ni. Mahse 7/11 awmze bul thum kha a bo chuang lo reng reng. Verb ah pawh hmang dawn se (eg. i ka kha han 7/11 teh… verb entirna mai chauh), 7/11 awmzia bul thum noun anih lai pawh a a awmzia kha a bo chuang lo reng reng. Chuvang chuan Thengreng tih hianin awmzia a neih chuan… eng part of speech ah pawn hmang ila, a awmze bovin kan hmang tur ah ka ngai lo….

    Report this comment

  11. 11
    Veepee Says:

    So sorry.. thengreng hi a bulthum a noun anih lai te ka ti mai mai… abul thum ah chuan adjective a ni zawk…. noun a hman ni emaw adverb a hman a ni emaw, a awmzia a danglam lo turah ka ngai ka tihna zawk a ni e.
    Hai re hai… zanin chu tui nu (fim lo) in ka thluak a ti buai deuh hlek a.. min lo hrethiam hram hram te u.. :)

    Report this comment

  12. 12
    virthli Says:

    Ban = sticky ( Adj.)
    Ban = Arm ( Noun), Post ( Noun)
    Ban = Reach, Grab ( Verb)
    Ban = Fire (Verb)

    Context hrang hranga a awmzia te hi a in relate hran lem lo

    Report this comment

  13. 13
    virthli Says:

    “noun a hman ni emaw adverb a hman a ni emaw, a awmzia a danglam lo turah ka ngai ka tihna zawk a ni e”

    He statement hi ngaihtuah zau leh deuh zawk la. I pawm kher lo mai thei bawk.

    Report this comment

  14. 14
    Veepee Says:

    ‘Ban’ tih thumal in awmzia hrang a neih theih dan chu tonal word anih vang a nia. Chutiang bawk in ‘lei’ tih thumal pawh. ‘thengregng’ bikah hian tonal word a ni ve em le…. chuan han sawi tum leh chu Ban – sticky anih na laiah khan eg. He chhangban (noun)hi chhangban (noun) ka ei tawh zawng zawng aiin a ban (adj) ber ang. (a awmzia a danglam lo).
    Thengreng (noun)= ?
    Thengreng (adj) = Kilkhawr
    Thengreng (adv) = ?
    Thengreng (verb)= ?
    Universe tranlate nan chuan a hman chi dawn emaw ni le. Noun ah pawh hmang ila, adj a nih khan awmze hran daih a nwi dawn si a.

    Report this comment