Vawiin hi Lal Isua Jerusalema Lal anga a luhna ni champha, ‘Tumkau Ni’ (Palm Sunday) kan lo tih thin kha a ni a. Kum tam tak liam taah kkhan Lal Isua chu he khawvela a lo kal lai khan vawiin angah hian Jerusalemah Lal ang in a lut a, Sabengtung chunga chuang in khawlai a fang a, mipui ten amah lo lawmin a kalna turah an puan te, chhawl te an lo phah a, Tumkau te kenga ban phar chungin , “Hosanna, Lalpa hminga lo kal chu fakin awm rawh se’ tiin an ru rual dual dual tawh a ni. Hemi dungthul hian tukin ah pawh hian khawvel hmun hrang hranga Kristian te chuan Lal Isua chawimawi nan kawng zawhin ‘Hosanna’ tiin an aurual leh dual dual a ni.
Hosanna tih hi Aramic tawng atanga lak a ni a, ‘Tunah Chhandam rawh’ tihna a ni. Lal Isua lal anga Jerusalema a luh khan Juda te chuan an hmelma Rome ho tena kum tam tak chhung an lo hnuaichhiah tawhna leh an tihduhdahna lak atanga chhandam /chhanchhuak theitu tur ni a an ngaih avangin amah chawimawi nan Hosanna an lo ti dual dual a. Mahse an duh ang leh tum anga thil a awm tak loh avangin Hosanna an tih chhung a rei lo kher mai. A hnu lawkah chuan a hma a Hosanna titu te ngei ngei pawh khan Lal Isua chu ‘Kros ah khengbet rawh’ tiin an aukhum ta chiam mai a ni.
Keini ngei pawh hi kan in enfiah a ngai hle mai, tukin a Lal Isua chawimawi nana Hosanna ti a au te ngei ngei pawh hi nakin lawkah kan Hosanna rawl hi a dang leh mai ang tih a hlauhawm hle mai. Vawiin a Hosanna kan tih hian naktuk leh kumtluan daih se la Lal Isua hi chawimawiin awm reng se la a va tha em!
Tunlai ringtute hi kan Hosanna rawl a danglam chak lutuk hi a pawi a ni. Pathianah pawl tharna leh siamtharna te kan han chang a, amah fak nan theihtawp chhuanin kan zaiin kan lam a, mahse engemaw vang mai maiin a hnu lawkah kan thahnem ngaihna a chuai a, kan ban pawh amah fak nan kan phar leh hlei thei tawh thin lo.
Thinlung taka Hosanna ti lova a pawrpawleng leh pawnang chauh a Lal Isua chawimawi a fak hi kan tam thin hle niin a lang. Juda te pawh kha an nih kha, a hunlai chuan Tumkau keng chungin ring tak takin an au a, mahse a hnu lawkah misual te zingah chhiarin an khenbeh tir leh mai si. Keini ringtute pawh hian kan Hosanna rawl hi i in enfiah ang u. Vawiin a Pathian kan fakna hi duhtawk mai lovin engtik lai pawha Lal Isua hi faka amah fak nana Hosanna ti zel thei turin i in buatsaih ang u.
Tukin zinga Sunday School naupang tena khawlai fanga Hosanna ti a an au rual na hian Kohhran mipui te leh Kristiante hi min kai harh thar leh se, ngaithla liam mai lovin kan thinlung zawng zawng nen he lei leh van lal ber chawimawi nan hian ‘Lalpa hminga lokal chu fakin awm rawh se’ tiin i au ve ang u.
Similar Posts:
- Hosanna in the highest
- Thihna hnehin a tho leh ta!
- Rem thu leng rawh se
- Mizo tawng tlem i zir lawk ang
- CCR for Mizoram
April 7th, 2009 at 12:37 am
thra thrang thrang hle mai…kan dazat hlawm tawh a nih hi.
[Report abuse]