1st. Sunday:Aizawl Bishop, Most Steffan Rotluanga chuan vawiin khan Kawnpuiah St. Peter Parish a hawnga; he Biak Ina puithiam hna thawk tur Rev. Father Matthew chu a nemnghet nghal bawk a ni.
2nd. Monday: Vawiin khan Zamuang khaw pelh hretah Vairengtea Presbyterian Kohhran Hmeichhe Inkhawmpui Liana palai kal hawlam chu an chuanna Sumo MZ 01 B 7465 a chetsual avangin a chhunga chuang mi pariatin hliam an tuar. Sumo hi brake thatloh vanga tlanliam nia hriat a ni. Hliamte hi Kawrthah damdawi inah lak nghal anni.
3rd. Tuesday: Vawiin chawhma dar 11:00 khan Hnam Chhantu Pawl chuan an din champhaphak vawi 15na chu Upper Republic venga an workshop-ah an lawm.
4th. Wednesday:UPC Mizoram, Dinthar bial thalaite chuan an din champhaphak lawm nan vawiin khan Aizawl khawpui chhung hmun hrang hrang an tifaia; he hnatlangah hian thalai za chuang an thawkchhuak a ni.
5th. Thursday; MZP chuan India sipaite’n Jet Fighter hmanga Mizoram an bomb ni, ‘Zoram Ni’ tia an vuah chu vawiin khan I&PR Conference Hall-ah an hmanga; he hun hi MJA President-in a hmanpui a ni
6th. Friday: Mamit DC hmasa ber Pu Z.Lalhmingliana (67) Saron veng chu vawiin khan Kothari Medical Center, Kolkata-ah thin natna avangin a boral.
7th. Saturday:MNF Party chuan 16th. April-a Lok Sabha leh South Tuipui biala MLA by-election neih turah tualto party-te thawhpui an tum thu an sawi nawn leh.
8th. Sunday:Khawvel puma hmeichhiate ni, International Women’s Day chu Women’s Instutute for Social Development of Mizoram (WISDOM) Diocess Catholic hmeichhe pawl (DCHP) leh Zoram Entu Pawl (ZEP) buatsaihin vawiin khan I&PR Auditorium- ah hun hman a nia, Women in Black hun hman nghal a ni bawk.
9th. Monday: Bawngkawn, Lunglei Road-a thichhawnga chhar, Hmangaihsanga (38) Pawlrang khawchhuak, tuna Zuangtuia khawsa mek chu zanin dar 9:30 khan a boral.
10th. Tuesday: Gauhati-a Mizo Welfare Assn. chuan Branch YMA din an tuma, hemi chungchanga thutawp siam tur hian vawiin khan Tirkhana Hall-ah an thukhawm.
11th. Wednesday:Vawiin khan Bawngkawn Branch KTPte chu Tuirialah blanket suin an hnatlanga; heth hian an member pui Rodingliana (23) s/o C.Ngurkunga, chu tuiah hian tlahlumin a ruang hi dar 1:30pm vel khan hmuh a ni.
12th. Thursday:.Vawiin khan Bilkhawthlir bialtu Pro Pastor Pc Nghaklianmawia leh Janet Lalnunhlui chu Serchhip hmar veng Kohhran Biak Inah chawhma dar 11:30 khan an innei.
13th. Friday: Mizote Kut zinga ropui bera ngaih Chapchar kut chu vawiin khan district khawpui hrang hrang leh khaw thenkhatah hman a nia; kut lawman pui ber AR Lammualah chuan kut pa Lal Thanhawla CM hovin hlim taka hman a nia; Lammual leh a chhehvel khat tlatin mipui an pungkhawm a ni.
14th. Saturday: Vawiin khan Serkhan VC huamchhunga kang mei chhuakah tualchhung tlangval pahnih Zonunzira (27) s/o Lalnuntluanga leh Laltlanmawia (28) s/o Muankimate chu an kang hlum. Anni pahnih hi kangmei thelh tuma thawkchhuak anni. Mite ui an hlawh hle.
15th. Sunday: 13th March zana Aibawk rural Bank rawktu Malsawmdawngkima (20) Sateek khua nia insawi chu Kulikawn Police-te chuan vawiin khan an man.
16th. Monday:Vawiin khan Agriculture Dept. hnuaia SAS-I (AEO) laktharte traning, Induction & Short Traning Prog. chu an dept hall-ah neih a ni.
17th. Tuesday:Mizoram Legislative Assembly vawi 6-na Budget session chu vawiin chawhma dar 10:30 khan tan a ni.
18th. Wednesday: Israel Nation Front of Mizoram chuan an President Pu Rualpawla’n 16th. April a Lok Sabha inthlan lo awm turah independent-a chuh a tum thu vawiin khan an puang.
19th. Thursday: MPC Party chuan vawiin khan an party office-ah General Assembly neiin hruaitu thar an thlanga; President atan he nihna lo chelh mektu, Brig. T.Sailo, MLA chu an thlang nawn leh.
20th. Friday: Phaisen khuaa Minor Irrigation leilet chawmna tur tui lakna an siam, Hailakandi Police leh Forest-in an tihchhiat chungchangah vawiin khan Mizoram sorkar aiawh leh Assam sorkar aiawhte an inbiaa; an thu a inkalh avangin thutlukna an la siam thei rihlo.
21st. Saturday: Social Welfare Dept. hnuaia naupang hmakhaw ngaitu pawl, Bal Bhawan Society-in Khatla YMA Office building-a a din, Mizoram bal Bhawan hmasa ber chu vawiin khan Governor Pu MM Lakhera-a’n Chaltlang Tourist Lodge-ah a hawng.
22nd. Sunday: Selesiha College of Veterinary Sciences & Animal Husbandary-in tun thla ni hnih atanga an buahsaih tan tawh ‘Recent Advances in Molecular and Immunological Technique for Diagnosis of Bacterial Diseases of Animals’tih traning chu vawiin khan khar a nia; he traning-ah hian State hrang hranga University hrang hrang atangin mi 24 an tel a ni.
23rd. Monday: Representatives of Peoples Act anga India President-in Lok Sabha 15-na din tura mipuite aiawh thlanna tura hriattirna vawiina a chhuah tlawhchhanin Mizoram State Election Commission pawhin Mizorama Lok Sabha seat khat hnawhkhahna tur leh South Tuipui biala Assembly by-election neih turah vawiin vek khan hriattirna a chhuah.
24th. Tuesday: Chief Minister Pu Lal Thanhawla chuan, “Mizoram leh Assam ramri chingfel turin bawhzui zel a nih tur thu vawiin khan house a hrilha; ramri chungchang chu party hamthatna atan inpuhmawhna chi a nihloh thu a sawi bawk.
25th. Wednesday: Vawiin chawhnu dar 2:00 khan MJA Office-ah MPC leh MNF chuan MP Candidate leh South Tuipui biala MLA by-election a candidate tur, MP atan Dr.H Lallungmuana leh MLA atan K Lalsangate an puanga; anni pahnih hi ‘mipui candidate’ tiin a hming an vuah.
26th. Thursday: Mizoram State Legislative Assembly parukna thutkhawm vawi khatna chu ni riat chhung neih a nih hnuah vawiin khan tiamchin awm lova tihtawp a ni.
27th. Friday: Mizoram Board of School Education chuan vawiin khan HSLC examination result a tichhuaka; exam beitu zirlai 12,714 zinga 7687 pass in pass percentage hi 60.46% a ni. St.Paul’s HSS a zirlai PBLalnunsanga s/o PBLaltanpuia Tlangnuam Veng chu a pumpuiah pakhatna a ni.
28th. Saturday; Vawiin khan Mizote rilru kalsual mek siamthat tumtu pawl, Mizo Moral Reformation Network International chu synod Comtt. Room Aizawlah din a ni.
29th. Sunday: Jahmu & Kashmir-a duty-a awm, 5th. Assam Regiment, Naik Lalngaihzuala (43) 59 Rastriya Rifles-a awm mek, S/o Zahnuna, Sailam khua chu zanin dar 11:00 vel khan a duty na Riasi District-a Gulabgarh khuaah hel hovin an kaphlum.
30th. Monday; Tukin zing dar 2:00 vel khan Mamit Dist.-a Tuidam leh Kawrthah khuaah serthlum tiat vel rial a tlaa; in 20 luah tlak lohvin a chhiaa; thawm that ngai 70 vel lai a awm bawk.
31st. Tuesday: Thirsakawr hmanga India ram pum fanchhuah tum, Prabjit Singh chuan vawiin khan Raj Bhavan-ah Governor Pu MM Lakhera a kawma; a zinkual chhan leh a thlen chinte a hrilh.
Similar Posts:
- October 2008 Mizoram Diary
- August 2008 Mizoram Diary
- June 2008 Mizoram Diary
- April 2009, Mizoram Diary
- November 2008, Mizoram Diary
April 4th, 2009 at 9:45 pm
Hetah pawh hian kan comment leh lawk ange
[Report abuse]
April 5th, 2009 at 12:45 pm
Thra khawp mai. Kan bengvar phah lutuk, a bikin Mizorama awmlo te tan. Keep up the good work.
Ka ngaihtuah mai mai a, PAWL hi Mizoramah hian a va han tam tehlul em.. a hman hman hian an din emaw tih mai tur ani.. Hruaitu nih chak deuh vang hi a ni pakhat thei agem le? PAWL threnkhat te khi chu trangkaina an neih em em pawh ka hrelove a..
[Report abuse]
April 5th, 2009 at 5:46 pm
Va’n ti tha thei tak em.. Ka save hmak zel, a poi em Pu Chhan?
[Report abuse]
April 21st, 2009 at 3:32 pm
in ti tha thei bik e thu tha deuh post tur ka lo ngaih tuah ve rauh rauh a nge
[Report abuse]