Aw, Zoram! ka ngai em a che

December 8th, 2008 2:02 am by Zorunpuia

Duhaisam
-T.Zorampela (Zodi)



1. Chhaktiang kawlrawnah hian leng mah ila,
I sakhming sawi reng kan bang thei si lo,
Ka pian ka seilenna ram tiin,
Dawn lungrukah nghilhni i awm thei lo.

Aw, Zoram ka ngai em a che.
Nang lo chuan lawm a kim thei lo,
Dar ang tawn leh ni her chhuak thuai se,
Thinlai damten len ve maw ka nuam e.

2. Kan ram kan hnam lo san zelna turin,
Kan nun kan neih kan chakna zawng hlanin,
Lungngaih mangan buaina let zel te,
I tan hlimten ka lo dodai zel thin.

3. Mahse, vangkhua leta fan leh ni chuan,
I chhunga lungduh unaufa leng zawngten,
Khawchhak mi tia hming min selin,
Sirah damten puan ang min lo hnawl e.

Aw, a na tuar thiam zawng a har,
Hrilh ka hai, lunglam ka lo vai,
I tan ka tuarna leh hlim ni te,
Zantiang tawnmang mawl mai an chang zo ta.

4. Ramtin kiltina Zofate zawng hian,
Suihlung ruala thinlung hmunkhat puin,
Hmangaihnaa insuihkhawm zel hi,
Kei ka lungkham leh DUHAISAM a ni.

Kum 1960 leh 1970 inkar vel khan Zoramah harsatna hrang hrang a thleng a, a bik takin “Mautam mitthi” an tih mai phei kha chu tunlai angin central leh hmun hrang hrang atangin tanpuina a lo chhuak ngai lo va, mahnia do tlawk tlawk a ni mai thin. Tin, tam lo thlengin a nghawng kan tih mai MNF boruak rit tak avang pawhin mi tam takin mahni khua leh tui an chhuahsan phah bawk. Tin, Pathian rawngbawlin mi tam tak chu missionary in an chhuak a, Zorama let leh ta mai lo mi thahnem tak an awm ve bawk a.

Tin, Burma Sipaiah mizo tlangval sang tam tak han tang ta te pawh Zorama hawng tawh lo va, khiti lama awmhmun bengbel ta mi thahnem tak an awm a ni. Chutianga chhan leh vang hrang hranga tual leh mang atanga thlamuang taka an awmna khua leh tui chhuahsante zingah “Tiau Ral” han kai pha chin ngat phei chu hnam dang kara hreawm tak leh inthlahrung taka khawsain an rilruah an khua leh tui an vangkhua ngaih an bang ngai lo va, an pian leh seilenna Mizoram ngaiin an tap vawng vawng chang pawh a awm a ni. An inhmuhkhawm nikhua te hian an ti ti ber chu Zoram an ngaih zia leh engtikah nge kan hmuh leh ang? tih te leh an let thlak leh hun tur thlirin chhel tak leh Mizo takin an awm hram hram thin. Tin, then leh rual thuah pawh khaw khat leh ram khat chhuak an nih miau avangin mite hmuhsitna leh enhrangna te pawh a huhova dodaiin an tuar ho hram hram thin a ni.

Hun leh ni te an lo ral zel a, hmana naupang tualchai rual ho kha nula/tlangval an lo ni ta a. Rimawi lamah pawh nasa takin hma an sawn a, hlaphuah leh zai lamah pawh an duai lo hle a ni. Album te siamin Zoram lamah pawh mi te hriat an hlawh ve tan dawn chauh a, hetih lai hian an pian leh seilenna ram khawpui Aizawla Beat Contest an tihah chuan tel ve tumin harsa takin Tiau Ral kana an inpuahchah lai tak chuan he Best Contest huaihawttute chuan “Khawchhak mi” tiin an sakhming an sel sak ta a, an tel ve an phal sak ta lo a ni. Chu veleh hrilhhai tak chungin an mittui chu a tla ta zawih zawih mai a, an pian leh seilenna Zoram ngei mai chu, mi ram pan bawka an chhuahsan a lo tul leh ta a ni. An ni hi “Zodi” tia hriat hlawh an ni a. An hlahphuahtu ber chu T.Zorampela niin Guitarist a ni nghal a, an zaitu lar zingah Lalhlunmawii chu kan la hre hlawm mai thei e.

Tichuan, an khawsakna Tahan khawpui lamah chhovin, an hotupa ber T.Zorampela chuan “Duhaisam” tih hla chu rilru na tak chungin a han phuah chhuak ta a. Tin, an albumah vek hian “Khampat Bungpui” tih hla Rev.Liamthuama phuah an sa tel bawk a. He hla pahnih hmang hian Zoram dung leh vang chu an rawn ti nghawr nghing ta a. Khatih hunlaia nu leh pa te thinlung vel taptu ber hla mawi a lo ni ta a. An sakhming lo seltute tan chuan inchhira tah vawn vawn puina tham khawpa hla ril leh mawi a tling a, pawi an ti ve ngei ang.

Hetiang hian mahni dinhmunah inchan tir ta ila; kan hna leh kan zirna avang te, kan khawsak phung leh kan rawngbawlna avangte pawhin Zoram kan chhuahsan a ni thei e. A then chu USA-ah te, Europe ah te, Israel ah te Phai ramah te pawh a ni thei ang. Chung ram leh hmunah chuan kan fanaute pawh an lo seilian hial thei a ni.Eng emaw hunah mahni ram ngeiah lam ang letin, in titatu taka kan khawsak laiin ramdangmi tiin min lo sel ta tlat mai se la, engtinge kan ngaih ang le? kan Zodi unaute rilru nat tur zia chu an dinhmunah hian din pui ila, kan hriatthiam pui thei maiin a rinawm. Kei chuan ka lainat a, ka khawngaih a, ka vui pui tak zet a ni. He hla mawi tak mai hi Rangoon Mizo zaithiamten mawi tak maiin an rawn thlawh dial dial mai a, thinlung takin i lo ngaihthlak sak teh ang u khai.

Similar Posts:

Recent Posts:

24 Responses to “Aw, Zoram! ka ngai em a che”

  1. 1
    Borat Says:

    Talented, cute artists say: Aw Zoram ka ngai em a che.
    Zoram: Aw Congressmen ka ngai em a che

    Report this comment

  2. 2
    jemi Says:

    heti lam ah hian keizawng ka comment e…. an thiam leh thiamloh poh ka se lo. mahse inthlan boruak ka ning lutuk..

    Report this comment

  3. 3
    jemi Says:

    Lolzzz…. :)

    Report this comment

  4. 4
    SeVeNeLeVeN Says:

    he hla hi nguntak a ngaihthlak chuan thinlai lungril afan dan adang raih mai…kan zoram riangte hi hmuh chak em em in an lo dawn ve thin…khua alothang zel a..mizoram ah chuan truan zai an han rel ve a..mahse mizoram mi te chuan khawchhak mi anlo ti leh si a…an ram hmuh chak em em…kan zoram hmuh ka chakin ka ngai em e anlo tihna zawng zawng kha rilru natak chungin khawchhak lam ah anliam leh ta a..chumi thinlungna reh thei lo chuan hetiang hian hla in anrawn chhamchhuak ta ni awm tak a ni….uluk tak a ahla thu ngaithlak chuan…hnuk pawh a ulh thei hial a ni…

    Report this comment

  5. 5
    Kimas Says:

    Nia rilru a khawih khawp mai.

    Report this comment

  6. 6
    H.Vangchhia Says:

    He hla hi a lo chhuah tirh phat atang khan ka la duh reng. Theater Hall ah concert an rawn neih te kha kala hre reng mai. Abba the Movie chhuahlai kha ni nghe nghe in ka hria… thuamhnaw var vek hi an ha a, kei pawh khan kekawr tlang 12″ vel malpui tight tha tak kha ka ha ve ngei in ka hria….

    Zodi ah chuan hemi hla…Vulmawi ah chuan Parmawi Rimtui tih te hian rilru a khawih khawp mai. Mizo hlathu ngei an hmang bawk a, a mi deh dan a dang tlat.

    Report this comment

  7. 7
    H.Vangchhia Says:

    Zorunpui thianpa…Lalruanga (Vulmawi) in hemi CD hi mi pe ve a, Tahan a ti tlat in ka van hre em!! Yangon/Rangoon ni lovin.

    Report this comment

  8. 8
    chepahakhata Says:

    @Pu Zorunpui i rawn thawh tha hle mai.Tun a mite ho hi Zoawi Family an in ti a hmeichia ho khi Yangon a awm an ni a, Lalnungsang & Thanthawng (T.Melody) te khi chu Tahan a awm an ni a, Yangon a a siam a ni. Tahan a VCD an siam Zodi , Vulmawi, hranghlui zathiam , hranghlui zathiam ho an fate & thangthar zaithiamte zaina a hranin a awm a chu2 Pu HV i hriat pawl a ni lo maw? A hnua a link-ah hian an chanchin kim zawkin a chhiar thei e.

    http://www.chhaktiangzirlaite......post_id=63

    Report this comment

  9. 9
    chepahakhata Says:

    Heng hla thu atangte hian Zoram lama rilru zim tak2te hian insiam that nan hmang se a va lawm awm dawn tak em!!

    Report this comment

  10. 10
    chepahakhata Says:

    Pu HV ahnua a link a mi hi lo en teh, heta mi zawk hi a ni lo maw i ta chu?

    ttp://www.zoin.info/han-khawpuiah-dvd-thar/#comments

    Report this comment

  11. 11
    H.Vangchhia Says:

    Khi ngei khi mawle…. ka hriat sual aniang… tunlai chu Mizoram ringawt rilru ah a awm a, engmah ka clear lo

    Report this comment

  12. 12
    Burbura Says:

    Hotupa chu rawn ziak tha leh hle mai.
    Kan duh takten leng dang tawnah chang dang mi kansan ta sela;

    “Aw, a na tuar thiam zawng a har,
    Hrilh ka hai, lunglam ka lo vai,
    I tan ka tuarna leh hlim ni te,
    Zantiang tawnmang mawl mai an chang zo ta.” ti ve vawng vawng mai ila a inrem ve tho ang tiin ka lo ngaihtuah kual a.

    Pu HV, sawi angin “mizo hla thu ngei an hmang bawk a” rilru a khawih hle mai.

    Report this comment

  13. 13
    adelfos Says:

    E khai hotupa hnuk a ulh thei mai dawn ka ti! A hla chu a va runthlakin an va han sa thiam teh reng em! No more comments..the song itself tells all there’s to tell!

    Report this comment

  14. 14
    Zorunpuia Says:

    Kan hotute, Ni e, he hla hi a eng emaw lai chhe te te bak ka lo hre ngai lo va. Zodi album ka lei a, a tel lohna ber kha a lo ni leh zel a. Hei tunah ZoAwi family ten nalh tak leh run thlak tak maiin an rawn sa a. A hunlaia an feeling tur leh an beisei ang a, an unauten an lo en mai lo chu a hrilh hai thlakin a rilru nat thlak khawp ang. Tin, he hla phuahtu Pu Zorampela hla thu ho hi ka ngaithla zauh zauh thin a. Mizo tawng a hmang nalh thei hle in ka hria. Tunlai zaithiam Zomuanpuii khan “Chuai lo Parmawi” tih hla a sak te kha a nalh ka ti tlat.

    Tuna misual.com a lenglut tam tak te hi kum 20 a lo ral leh chuan mi tam tak chu hnathawh leh eng eng emaw avangin kan awmna ramah fanau neiin kan awm thei a. Chutih hunah chuan Zoramah khian ramdangmi tiin min lo sel se, Zoram tana kan rilru senna te, Zoram kan ngaih zia te, Zoram kan thlakhlelh zia te, kan ram neihchhun ngei a nihna anga kan lo vei em emna te chuan kan rilru a ti na ve ngawtin ka ring. In ni ve hlawm emaw chu..

    Report this comment

  15. 15
    valbuanga Says:

    Kan naupan lai, han ti ve khanglang ila, school zirlaiah khan a tel thin a.. ka duh thei ltk. Hei hi nia khatih hunlai hla leh tunlai chhuak danglamna ni a ka hriat chu. Khatihlai Hla tamzawk kha han dawn chiang ila, chenchilh tum in phuahtu te thlirdan leh phuahchhan han thlirpui ila rilru fan leh mi khawih raih thei an ni tlangpuiin ka hria. Khang hlate kha han dawnchian chuan mahni chantur a inbel nghal mai awl tak a ni hlawm. Mahse tunlai hla lo piang ve te hi zawng.. han ngaihtuah chian a han bih chian pawh tum ila, bihchian tham hi zawng a tlem khawp in ka hria. thlirchian ngaihna awmthlawtlo a i tlangpui.

    Hehla hi zawng kan zirlai ve rang reng pawh khan lung kha a ti chhe tlat thin. Thluk ka thiam lemlo thin na a

    Report this comment

  16. 16
    RDAC Says:

    Kan u Zorampelan he hla mawitaka a phuah hi Zodi zaithiam kan u Thanghlira khan a sa a , an record a. He hla tel cassette a lo chhuah chiah khan Burma sorkar khan a ngai pawimawh/hua ta a, 1975? vel kha a ni a, Tahanah kan inah Burma sorkar Intelligent officer (Special Branch) U Shwe Thaung khan ka pa a ron kawma, “He hla hian engnge a sawi duh chhan? Burmese in lo let la naktukah ka ron la ang” a ti ta mauh mai a. Burma Kawl officer misual tihtakah a pistol te kha ka pa hmaa table chungah a han dah vel a.

    Ka pa khan “hla thu a ‘Zoram’ a tih hi tlangsang/zoram tihna a ni a, tuna Chin State/Chin Hills khi a phuah chhan a ni” tiin Burmese in a lo lehlin sak ta a. Burma sorkar sual ho in “Foreign ngaihna hla phuah” tia kan u Zorampela leh Zodi member ho man a tan in an tan tir tum kha an pehhel thei ta hram a ni. Kan naupan ve lai min ngaih tir e.
    He hla hi chu a mawi in a thra a ni ber mai e.

    Report this comment

  17. 17
    ThaiBoy Says:

    He hla hi ka ngai thla nawn tlut tlut mai. Old Version rawn up load thei kan awm em aw..?

    Report this comment

  18. 18
    wonderboy Says:

    @pu thaiboy, mp3 in zodi hla hi ka nei nual a, i hla sawi hi a awm chuan ka la rawn pe dawn che nia. (tunah tak chuan a awm leh awm loh ka sawi mai thei hrih lo)

    Report this comment

  19. 19
    vawrselapa_08 Says:

    Lalnunsanga khi a zaithiam ka tih thrin teh reng nen, he hla ah hi chuan a aw a dek tuai ka tih tlat pek chu. Ka beisei sang lutuk nge. A zai hmeichhia pahnih te khi an va han chhelo ve a. Sweet December a Ka nuam ve e tih leh Zo hnahthlak tih sa tu te kha an ni thei em aw ?

    Report this comment

  20. 20
    wonderboy Says:

    @18 hi @17 chauh ka chhiar a ka comment. a chunglam khi ka lo chhiar miah lo a, a video phei khi chu ka en lo hul hual mahse hei ka en ve hnu hnawh a a va mawi kher em ve le!!! ka ngaithla nawn ve ta tlut2 mai!!!

    btw, Sorry hotupa!! :D

    a lai a mi hi Daisy chu em ni a?? a suass bon!!! :D

    Report this comment

  21. 21
    ThaiBoy Says:

    wonder a lai ami khi chu an trail video a trang khan ka hauh tawh. chuh buai chi kani lovang; chuan Chiahpuam Episode 19 na ka en mek; Zapi hi a atang chhuah ve leh ka bem nghal char char ang. :) min duh hlauh chuan alai a mi khi chu kala pe ve ang che. :)

    Report this comment

  22. 22
    wonderboy Says:

    @pu thai
    “Aw, wonder ka ngai em a che.
    Nang lo chuan lawm a kim thei lo,
    Dar ang tawn ni her chhuak thuai se,
    Thinlai damten len ve maw ka nuam e.”
    a tih miah loh khi aw!! :-)

    @vawrselapa_08
    lalnunsanga khi chuan hmeichhe lak phak in a sak a ngai a hniam deuh in a sa alawm!!! D# in an la a, G/A vel te chuan la se a aw a pa leh hraih ang :-)

    off lehlawks:
    tunah tak hian pi dumpui-i te chuan USA siam ngat “Do not disturb” tih chu an tar mek. a der ila zing khawvar thleng rak an in a len ka va chak em!! :D

    Report this comment

  23. 23
    Mr.Pervert Says:

    @ThaiBoy: Zapi chu i duh vut vut ani maw… hei a toothbrush te pawh anlo dah reng anih hi.

    zapi toothbrush

    Report this comment

  24. 24
    funny Says:

    a thluk poh ka hre nek love.

    Report this comment

Leave a Reply

You must be logged in to post a comment.