Mizo tawng tih hausak

September 28th, 2008 2:05 am by Kimas

Mizo tawng tih hausak tih hi chak zawk leh mumal zawa kalpui a chakawm hle mai. Chuta tan chuan thil pahnih rawt duh ka nei a.

Pakhatna ah chuan Mizoram University a Mizo Dept hian workshop buatsaih sela. Dialect hrang hrang hmangtute zinga mi rawn tlakte chah khawmin tawng zirho nise. Dialect thenkhata kim lo thenkhata kim takte hi lak khawm dan awm se a tha ngawt ang.

Tuna grammar kan hman mek pawh hi sap tawng grammar hmanga ziah anih avangin a famkim tawk lova. E.g double adverb min tih sak mai pawh hi double adverd chu a ni teh meuh mai a, mahse chu ai chuan a ril fe si a.

Sap ho chuan a dah vak ngaihna an hre lo ani maithei. Kan misionary hmasate pawh khan Mizo thuhriltu hmasaten double adverb an hman nasat thu leh a hmanna tur an chian ve chiah loh avanga an hman ve ngam vak loh thu an lo sawi daih tawh. Double adverb pangngai angah hi chuan a hmanna tur chuti tehvakin a buai lo. Mizovin double adverb kan neih ho hi chu descriptive ani hlawm a.

Chu chu sap ho chuan an hmang ve thiam lo ani. Chuvangin kan tawng tihausa tur hian kan beih ho a ngai. Tuna Mizo tawng kan hman mek Duhlian tawng pawh hi a famkim lo khawp mai. Heng Burma rama chin tawng hrang hrangte leh Tripura Assam, Manipur leh Meghalaya a Mizo Hnahthlak tawng te hi workshop neia tihtak zeta kan zir chuan kan tawng chu a hausa ngei ang. Tin hei chian reunification ah hma a la nghal bawk ang.

A dang lehah chuan tawng dang hmang hian kan tihausa thei bawk. English tawngah hian kumtin word sang tel a piang a. A tam ber chu tawng dang ami lakluh ani. Keini pawhin chu chu kan tih ve loh chuan khawvel thang zela globalization ti lianin hma a sawn zel lai hian a tui hak zawngin kan khawsa ang tih a hlauhawm. Mahse a pawng a taka tawng dang lak chu a tha ber lo maithei. Kan mamawh dan tawk erawh chu thlir thiam ila.

Similar Posts:

Recent Posts:

15 Responses to “Mizo tawng tih hausak”

  1. 1
    Aryan Says:

    A hawnnan, chuan tunge chung wrokshop huaihawt man tum ta ang le?

    [Report abuse]

  2. 2
    muantea Says:

    Helam hi chu Art & Culture Deptt bitum chi a ni.A tha khawp mai.Mizo hnahthlak tawng hrang2 lakhawm ringawt pawhin nasa takin kan tihausa thei ang.

    [Report abuse]

  3. 3
    H.Vangchhia Says:

    muantea: a dik reng a ni… dik tak chuan tuna Mizo tawng kan tih pawh hi Mizo hnam chi hrang hrang tawng lak khawm a ni tlangpui sa hrim hrim.

    Tunlai/tunhnai a kan hman tak loh hmanlai a an lo hman thin te hi i thur chhuak tha leh ila atha khawp in ka ring. Entirnan: Sap (mingo) ho te hi kan pipu te chuan “Zawngrang” tiin an hming an lo phuah ve a ni awm a ! ( ka pu M.Laldailova (fam) 1890-1992 min hrilh) Thlangkawrvai/Vaingalsin ho nen kan in pawlh hnu khan an ni khan,”sap” ti a an address thin kha lo hre ve ta chuan, koh nan/address nan kan hmang ve chhawm ta a ni awm a. Mi huat zawng kan sawi ah ka ngai miah lo kei chuan, an ni pawn min vaihma in “Lushai” tiin emaw, min lo phuah ve tho. Bengali ho lah in Kuki min ti bang hek lo.

    [Report abuse]

  4. 4
    Zorunpuia Says:

    Zohnahthlak zawng zawng te hian dialect kan nei ve thliah hlawm a. Chu mi zinga lo lar ta ber chu tuna kan hman mek Lusei/Duhlian hi a ni a. A lo rei a, Mizo tawng tiin kan vuah ta a. Tin, Zohnahtlak dialect zingah a naupang ber a nih avangin dialect dang hmang te pawhin an hrethiam hma bik em em a, a chhan chu an dialect thenkhat a lo tel ve thin vang a ni. Heng avang hian a hmangtu pawh kan lo pung zel a. British ho an rawn luh pawh khan kan common lenguage emaw an ti nghal mai nghe nghe a nih kha. Mahse kan tawng chu ziaka kan la neih loh avangin Pu Buanga te chuan A,Aw,B min siam sak ta a. Zohnahthlak dialect zinga pakhat ve mai kha tih hausakin a lo awm a, a felhlel lai leh a kim lo lai kan thawmphui zel a. Tunah chuan lusei/duhlian dialect ti tawh lovin, Mizo Language tih ngam khawpin a lo ropui ta a ni.

    Chuvangin Zohnahtlak dialect hrang deuh hmangte pawhin inthlahrung lo taka an hman ve ngamna tur chu an dialect a tel ve tlat avangin an ngai mikhual tur a ni lo va, an ta neih ve tur a ni. Chuvangin a thiam vak lo te pawhin kan zir thiam thei a, kan hmang uar sauh sauh tur a ni. kan dialect thiam hle siin kan Language ber kan thiam loh chuan a fel thin lo. Hetih lai hian kan paite dialect te, kan Pawi dialect te, kan hmar dialect te, kan mara dialect te hi kan hnawlin kan tiboral tur tihna a ni lo va, kan thiam tel hle tur a ni. Amaherawhchu kan hmantlan ber leh Language anga kan neih awmchhun Mizo tawng erawh thiam theuh tum ila, a finthlak hle ang.

    Tin, he Mizo Language hi a la naupan bakah a la kimchang lo hle mai a. Hei tak hi Vai leh English word atang ni lo, kan hnam dialect hrang deuh, Hmar, Paite, Lai, Mara, etc.. atangin Mizo tawnga awm lo te hi hmangin thawmphui ila, a tha ber ang. Chumi tur chuan Zohnahthlak zawng zawngte huap zo Dictionary hi siam thei ila, kan chhawr tangkai viauin a rinawm bawk.

    [Report abuse]

  5. 5
    H.Vangchhia Says:

    zorun: Mizo tawng hrang hrang i duh duh min zawt rawh… :) kalo zirtir ang che :) i’ll be your diksawnari :D

    [Report abuse]

  6. 6
    Kimas Says:

    Tuna Mizo tawng kan tih duhlian tawng hi a naupang ber tih hi a dik chiah em aw? A development a nasat avang hian a tawng thar tak a nihna lai chu a awm a, mahse tawng naupang tih hi a dik chiah ang em? Kan thian pakhat Tidim(Paihte) hnam ami chuan MA (linguistic) Thailand-a a beihin Chin language ho hi thesis ah a ziak a, Mizo tawng(Duhlian) hi a bul ber niin a chhui chhhuak ve tlat asin.

    [Report abuse]

  7. 7
    H.Vangchhia Says:

    A chhui sual hle a nih hmel. Chhui tur a ni lova, hai chhuah a pho lan zawk tur asin.

    [Report abuse]

  8. 8
    Burbura Says:

    Mizo tawng tihhausak nan dailect hrang hrang atang fawmkhawm hi thil tha tak chu a ni. Mahse mizo tawng kal hmang dik tak kan neihsa su buai lo zawngin ni thei sela.
    Off topic: Hman nia @feeder rawn post “Mizo tawng diklo nge a hausakna zawk?” kha comment ka ziah lai takin ka internet a chhia, hetah hian ka ron post mai, a lo kal liam hman tawh si a.

    Min lo leng rawh tih ai chuan, “Lo leng rawh,” tih hi a samkhai et zawk a. Tichuan, a rawn leng anga kan duh duh kan ti tawh mai ang chu. Min rawn leng rawh tih pawh chuan engtiangin nge kan inkawm dawn a sawifiah chuang hran lo va. Min rawn kawm ve la, tihna ang vel tho a ni e. Nulain tlangval hnenah min lo leng rawh ti sela a la inhmeh thei deuh, mahse a aia mawi zawkin, “min lo rim rawh” tih mai tur a ni. “Leng” i hman dawn chuan “min” tih hi telh kher mizo tawngah a tul lo.
    “Chhung” tih hi adverb-ah kan hmang ngai em? “Lo va kal chhung rawh” kan tih chuan, “Lo va kal pawn rawh” tih chu engtihna nge ni ta ang? Tin, lo va kal chhung rawh tih hian ka rawn um pha ngei ngei dawn che tih a sawi chiang chuang lo.
    Lo va kal hnek hnek lawh lem.

    [Report abuse]

  9. 9
    Jaan Says:

    I rawtna hi tha ka ti hle mai. A bikin Mizo tawng tihhausakna tura hnamdang tawng lakluh hi. Dan fel tak ni lo (unofficial) a lakluh ni si, mahse mi tinin kan pawm (socially accepted) tawng tam tak a awm tawh si a tihchian vat a tha ka ti. Heti te hian ka ngaihtuah thin,”Kan tawng kan tih hausak chuan kan thu leh hla ten hlutna thar an neih belh zel ang a, nakin zela kan thlah lo la awm turte tan a tha dawn a ni” tih hi. Chuvangin hnamdang tawng ler leh tawng bawlhhlawh kan lakluh chak ang bawk hian kan tawng tihhmasawnna turin tawngkam mawi zawkte lakluh belh i tum theuh ang u. Entirna pakhat; Good morning/afternoon/evening atan Chibai kan han hman hian tawng hlutna kan tipung a nia, a dang pawh a tam ang.

    [Report abuse]

  10. 10
    taia-pa Says:

    Tawng tih hausakna lam sawi lai mek pawn tul miah lova zawngrang ho tawng kan hmang nasa lutuk,hetianga anih chuan engtikah mah keini hian kan ti hausa lul lovang Entirnan;
    zorunpuia’n dialect(tawng hman dan), language(tawng),word(thumal)leh H.Vangchhia’n address(koh dan),I’ll be your dictionary tih ang chi te khi tul miah lo ani tlat,fimkhur ang u.
    Tin,kei ka ngaihdan mai mai chuanPu zorunpuia sawi ang khian mizo tawng kan tih tak hi chu tuna zoram a tawng lar ber duhlian tawng bik hi niin ka hria,tawng dang mara,pawi,paite,etc hi chu zohnahthlak dang tawng chauh zawk niin ka hria.

    [Report abuse]

  11. 11
    Mahminga Says:

    Tawngah in buai a ni maw? Mizotawng chungchang lehkhabu hi ka siam mek a, in lo lei theuh dawn nia. A kimchang khawp ang.

    [Report abuse]

  12. 12
    Jaan Says:

    @Mahminga, tha takin han siam teh. Mizo tawng dik taka thuziah harsa tih chang ka ngah em mai. Vawn that tlat atan lei ka duh a nia. I hnathawh chhoh zel tur atan duhsakna ka hlan nghal bawk a che.

    [Report abuse]

  13. 13
    elizabeth Says:

    mahminga chu va thawk tha ve aw…i lehkhabu ziah chu a lei theih veleh min han hriattir vat la tha ang. t leh T tih vela la buai mai mai,keini ang te hian kan mamawh khawp ang chu. Chhim lama N G tia kan lam,hmar lama Eng tih amaw ni,nge Ek tih zawk…hei mai mai te hi ka thiante nen kan inhnial na ber a la nia.Chutiang lehkhabu chu kan mamawh zawng tak ani e

    [Report abuse]

  14. 14
    H.Vangchhia Says:

    taia-pa: mi sawi chhan a nih chuan…ka thianpa ka fiamna mai a nih kha… midang tan ka ziah ani hranpa lo ania… Zorunpuia pawn a la thutak hauh lovang :P

    [Report abuse]

  15. 15
    Thirkut Says:

    Heng thumal hi Mizo dictionary a tel lawlaw chi:
    Awverr, Den, Kawn,

    [Report abuse]

Leave a Reply

You must be logged in to post a comment.