Hmangaih lehkhathawn

August 31st, 2008 7:22 pm by Zorunpuia

Dear Thian duhtak

Chibai le, i nunkawng chhukchho harsatna chitinreng karah hrisel tak leh hlim taka i hringnun i hman ka duh sak a che. Hei erawh hrereng la ka va ti em, i tana ka thinlung leh ngaihtuahna ka senral zawng zawngte hi e, a thlawn mai chu chantir lul suh la;

Ka thian, ih e, I nu pum chhunga i awm atang daih tawh khan kei chuan ka lo hmelhriat tawh che a, khaw eng i hmuh theih hma atang tawh khan i tan hian ka thinlung ka lo pe daih tawh zu nia. Nausen fuke kim leh hrisel taka i nun a pai chhuah theih nan che duhsakna tinreng ka lo hlan thin a. Tichuan, i lo piang ta a, nausen duhawm tak i lo ni chho zel te kha ka va hlim thin tak em. Mi lawm pawh i hlawh em em reng anih kha.

I lo thanglian chho zel a, kumtling i lo nih tak hnu atang chuan engkim mai hi nangma duhthlanna ngeia i hmachhawn tur a lo ni ta a, nangma duhthlanna ngeiin i nunkawng i hmang chho ta zel reng a nih kha tiraw. Amaherawhchu, kawng engkima lo ngaihtuahtu che kei chu sirah min hnawl ta a, mahse i duhthlanna a nih phawt chuan tiin kei chuan ka lo thlir reng che a, mahse ka kal bo san phal ngai hauh lo che a.

Tanpui i mamawh huna tanpuitu hnai ber nih inhuamin i kiangah ka awm tlat thin a. Mahse maw ka thian, Nang chu khawvel nawmsipbawlna zawngin i tlan ta chiam a, mahse hlimna tluangtling erawh i tawng chuang si lo. I luh thuk pauh leh i beidawnna a thui ting mai si. I nunkawng a beidawng a, rilru hahna tinrengin a tlakbuak che tih erawh ka hriatpui che a, chutih lai pawh chuan i sirah tanpui che in huamin ka ding reng a, mahse nangin min ko ngai si lo.

Ka hming i lam ka rin em em laiin nangmahin chu i harsatna chu sutkian i tuma,i bei chiam a, mahse i sukiang tak tak thei si lo. I nu pum chhung ata vawiin ni thleng hian i thil tih leh ngaihtuahna zawng zawngte kha ka hre fai vek a sin.

Ni khat chu e; i nun tuihala chau em em mai chu in varanda-ah i lo muhil a, chu i rilru hah lutuk taksa chau tak chu ka rawn thlir che a, I hmel chu ni eng mawi tak lo chhuak chuan a rawn chhun set set a, i mit i nuai a, i suangtuahna chuan i lei leh ka rawn tawn chhuakin i tawngvai ta a, chu ta i chham chhuah chu maw “Aw, ka nun hi ka va ning em, chhantu ka ngai a ni” i ti a, i sir lawk atangin ka thlir reng che, i harsatna te chu chhawk che ka duh a, lainat em emin ka en reng che a, mahse tanpui tur chein vawikhatte pawh mi ko si lo. Ka va han lainat tak che em. Ka khawngaih che tluk zetin ka hmangaih che a sin. Aw! Ka ngaihtuah zia che hi engtikah tak hrechhuak ang che maw!

Vawikhat chu rilru hreawmna tinreng leh nun beidawnga i awmlai khan kawngsir phai hnimbuk kiangah i harsatna te leh i nun chhukchho hahthlak tak sawipui tur che in ka lo in beisei em em, ka lo nghak reng che a, mahse mi rawn pan duh ta si lo. A tukah pawh chutiang bawk chuan ka lo chang leh ran che a, a hma a mi ang bawkin rawn kal tih hun reng i nei thei si lo.

Nitin beiseina in ka lo thlir thin che a, mahse ka thian, rawn kal tihni reng i nei ta si lo. I harsatna chhawk che ka duh a, i phurrit chu lakkian sak che ka duh thin a sin. Nun beidawnga i vahvaih ka phal lova, nitin tanpui tur che hian i bul hnaiteah ka awm thin, mahse e tanpui tur che in vawikhat te pawh mi ko ngai si lo.

Ka thian, hei erawh lo vawng tlat la ka va ti em; Tuktin parmawi leh hlobet tinrengte vulna rammawi, van jerusalem tharah khian hmun i chang ve thei tih i hriat ka duh a, saron par leh lily parmawi tinrengten mawina an chhuahna rama chatuan nunna neitu pan turin i duhthlanna ngei kha ka tan a pawimawh si thin. A ni, Pathianin chhia leh tha i hriat theih atanga duhthlanna a pek che kha i tan liau liau a ni tih hria ang che aw. Chu i duhthlanna chu tuman an tih danglam sak thei lo che tih hre nawn fo la.

Sualna tinrenga i tluk pawha tanpuia kaitho leh theitu che chu keimah i thian hmangaih em emtu che hi ka ni tih i hriat nawn ka duh a, nangmah hmangaih tlattu kei ka tan hian i hlutna a nep chuang lo va, i thinlungah hmun min siam sak ve thei tawh dawn lawm ni?

Hmangaih em em tu che,
I thian Isua

-Zorunpuia

Similar Posts:

Recent Posts:

12 Responses to “Hmangaih lehkhathawn”

  1. 1
    ThaiBoy Says:

    Haleluiah Amen!!!!!!

    Report this comment

  2. 2
    myself Says:

    Pu zorunpuia chu i thawnnu khan a lukham hnuai ah ala dah tha khiau asin!!

    Nikin ni ah a rawn phawrh chhuah loh kan beisei :)

    Report this comment

  3. 3
    Zorunpuia Says:

    ekhai pu myself, khawvel hmasawn zelah hian hringnun hian beidawn chang a nei ve thin a ni chek ang. I tan ni bik lem chuang lo, lehkhathawn a lo pian leh tak hi.. :)

    Report this comment

  4. 4
    blackmagicwoman Says:

    Sunday a chhiar chi khawp mai. A tha e.

    Report this comment

  5. 5
    amanda Says:

    @zorun: I ti tha lutuk sunday apiang in Pathian thu lam chhiar tur hi awm thei zel se duhthu sam a ni.

    Report this comment

  6. 6
    Zorunpuia Says:

    A lawmawm e @amanda, ni e tiraw. A tir leh a tawpna hi chu Amahah tho hian a ni thin si a. Pu myself te hian tangkai pui tak maw.. :)

    Report this comment

  7. 7
    ConstantineXX Says:

    ka hlau ang reng reuh, mitthi tawh atanga lehkha thawn dawn nulh chu… hmulthi a ding dawn alom le

    Report this comment

  8. 8
    adelfos Says:

    Great! kan pu zorunpuia nge nge! A ropuiin chhiar a manhla takzet mai. Ni e, heti lam hawi te hi rawn ti zeuh zeuh teh u khai…

    Report this comment

  9. 9
    rodoey Says:

    amen!

    Report this comment

  10. 10
    amanda Says:

    @Zorun: Kan pu myself a hi zawng eng ti kawng zawng pawh a in todelh ngang hi a nia,helam pawh hi a khatliam viau tho in ka ring :) a thusawi ngaithla tur va zin phei ve te pawh a chakawm khawp mai :)

    Report this comment

  11. 11
    Zorunpuia Says:

    @ConstantineXX, ekhai hlau mah ta che, a thi a, a tho leh alawm.

    @adelfos, ekhai hotupa, i tih zawk tur ni awm tak a ni a, kan han ti thla ve rawk tak na a, a ngan duh khawp mai. Lehpek chu i kutchhuak kan lo ngaihven ang e..

    @amanda, ni e tiraw,, a ni hi zawng allrounder ngang hi a nia. A hmel a that ang bawkin a ngaihtuahna te pawh hi a tha thin e, an ti.. :) Nimin piah kha a B’day a ni lehnghal a, ka han lawmpui hnuhnawh ang e. Congrats to pu myself.

    Report this comment

  12. 12
    myself Says:

    Pu Zorunpuia chu i ziak in ngaihtuahna a ti thui hle mai .nang zawng ‘hmangaih e-mail’ i thawn chhuak hnem cher cher bawk a, a tawngkam vel pawh a in man tha thlap thlap khawp mai :)

    Report this comment