Mizo leh Music (Production)

March 30th, 2008 10:34 am by Beta_lr

Mizo te hi zai ngaina hnam kan ni a, music pawh kan ngainain kan man tlangpuia, guitar perh thei mai lah kan tam, a chord mil a zai puithei nghal deuh vek kan nih lai hian engatinge kan music production hian tun thleng hian hma a la sawn theih miah loh le???

60′s chho vel kha chu lo dah tha ta ila, tun hunah hi chuan Recording Studio pawh kan nei tha tawh viau a, equipment leh instrument pawh a tha leh changkang ber ber kan la lutin kan hmang ve thei zel tawh a, artist te leh musician te pawh thiam tak tak kan nei fer fur tawh a chutih lai chuan kan ram chhehvel (mizo tawng hrethiam lo) ten min comment dan chu ” Why do mizo song sounds all the same”, tih te “Mizo songs are all similar” tih te, chu mai piah lamah kan mizo mipui te ngei ngei pawh hian mizo hla hi chu a intro atang ringawt pawh hian kan hriathran nghal theih deuh zel hi chu ka ring.

Hei hi a chhan chu Music production kan ngaihpawimawh tawk loh vang ani a, hei hi kan dinchhuah theih loh nachhan ber pawh niin ka hria. Soung engineer te hi kan sawi chamchi a mahse tuna kan recording studio tam tak a thawk te hian an thiam lutuk an duh chuan mahse khatiang a uluk taka ti tur khan an hlawh tlem dawn bakah hun an insiam tam tawk lo hrim2 a, chuvang chuan an tan chuan a awlsam thei ang bera siam zung2 a, a tam thei ang ber customer neih kha ani lo thei lova chu chuan tun thlengin hneawm khawpin kan mizo music production hi a kal pui mek a, kan thiamloh bik vang pawh ni lovin music production kan ngaihhlut leh ngaihpawimawh loh vang chauh zawk ani. Sumdawng rilru kan pu lutuk leh kan artist ten in sen an huam loh lutuk vang hian kan survive loh a hlauhawm khawp mai.

Tunah hian mizoramah hian music hi eizawnna tlak ala ni a, a mipuiin kan ngainat miau chuan leitu chu an awm reng dawn, in sen huamin album khat pawh rei fe pawh bei mai sela, single tan pawh musician te hire in uluk takin recording nei sela (producer, copyright…etc) chu chuan a grade a tih san mai bakah ati hlu leh zual dawn a, chulo a pawimawh ber chu a ti ngaihnawm lehzual em em dawn bawk ani. Hetiang reng a kan kal chuan kan thalai te hian nakin lawkah mizo hla ngaih hlut nachang an hriat loh mai bakah ngaihthlak tlak lohvah an ngai thuai ang tih a hlauhawm khawp mai.

Music production hi i ngaipawimawh ang u, kan uluk a kan ngaihpawimawh chuan mipui pawn an hlut leh zual dawn tih i hrethar ang u.

Kan ngaipawimawh viau tawh amo ka tih laiin tun thlenga kan mizo album chhuak thar, keyboard soundtrack + Guitar nena kan la tih tleng tleng vangin ka rawn thai lang ve ani e.

p.s Remkimi cherput pawh kha ka ui lutuk a zai thiam teh reng nen kei chu a live recording kha ngaihnawm ka ti zawk daih.

Thank you for reading.

Similar Posts:

Recent Posts:

16 Responses to “Mizo leh Music (Production)”

  1. 1
    Pachebuaia Says:

    Dik khawp mai, mizo hla tlangpui hi chu a intro atrang hian a hriat deuh zel. Nalhlo tih na ni chuanglo in, cutting edge production/producers hi kan la nei vak lo a nih hmel.

    Report this comment

  2. 2
    Thirkut Says:

    Music kaihhnawih tho, in zul lek lek, mahse dang deuh hlek. kan lo sawi daih:

    Tunlaia ka ngaituah ve mai mai: Kan Zo culture a musical instrument kan la hman awm chhun chu kan khuang a ni. Kan tawt-taw-rawt hran hran leh kan ting-tang hrang hrang chu missionaries ho vang khan a chimit vek ta daih mai a, a uihawm khawp mai. Khuang khap an tum erawh kha chuan, kohhran then te kha a buai phah zawk zamah a, an khap lo leh si kual vel a nih tak kha. Tun a han en hian, nakin zel ah pawh khuan hi chu a la rik dup dup zel hmel khawp mai.

    Kan music a nalh tawk chuan produce chak an rawn awm mai ang. Tun ah rih chuan mi style imitate tu kan ni tlat si a. Keini style ngei a rawn la in develop chho mai ang chu maw.

    Report this comment

  3. 3
    muantea Says:

    Ram/hnam in develop tur chuan kalkawng thui tak kal a ngai.’zuninah e suh’ tih ziak la tar ngai stage ah hi chuan duhthusam ram tawn a la har a nih hi.Music lama graduate pawh kut zungtang thliah tham lek kan la nei rih si a,music lamah pawh kan thleng sang viau tawh zok lo mo?! Tin,tawng hriat than loh zai hi chu confuse a awl reng a ni.Kei pawhin vai film hla hote inang thumin ka hre ve tho asin!

    Report this comment

  4. 4
    Frankenstein Says:

    A dik khawp mai. Tunlai kan music hi hmanni lawka Tribal Powerte, Pasalthate, Albatrosste, leh Dream Hunterte ho hunlai ai khan a hniam zawk emaw tih mai tur ani. Tan kan lak thar chu a hun tawh tak meuh ani. Keyboard soundtrack leh guitar chauh hmang tawh lovin, instrument dang tam tak pawh hi lo ri ve se tichuan ngaithla tute beng a tlai mai dawn alom. A album buatsaihtute mai nilo, mipui hote pawh hian kan hlutsak phah zawk ngei ang.
    Heng vangte hian ani chek ang chu saphote hian an mahni kutchhuak music an hlut em em a, lo copy emaw an awm chuan courtah khinga sum tamtak an chawitir thin.

    Rawn thawh tha khawp mai Beta_lr, ka lo vei ve thin ania.

    Report this comment

  5. 5
    Beta_lr Says:

    In rawn comment atanga a music hrim hrim a kan belh leh duh mai mai chu tun dinhmun a kan mizo music tam zawk hi studio atanga uluk vak lova siam chhuah ani tlangpuia, kan hla tha leh thluk nalh tak tak te hi hei ai hian kan la chhuah nalh leh zual thei ani. Musician hi kan nei tha thawkhat viau tawh kan chhawr lo zawk ani. Ebtirnan mai mai “Ka Duhsamber- Alpha various artist” te hi tlema uluk deuh a an han khawih chuan beng a fah nghal hle a, he hla hi keyboard soundtrack atang vel hian siam ta se, chang thumna velah hi chuan kan ning tawh mai lawng mo te ka ti ve mai mai!
    Rawn thawh ve zel teh u vei ve fe2 in tamin ka hria. Ngaihdan thawh khawm te hi a bengvar thlak ania

    Report this comment

  6. 6
    hp.swing Says:

    Nia, music tui ve tan chuan Mizo music hi chu a ninawm ta deuh. Style ngai put put kan hmang a, Idea kan nei tha tawk lo nge ni? Kan uluk tawk lo. Kan thianpa studio nei pakhat chu ti hian ka zawt a, Track 1 siam nan hian hun i hmang rei em ka tia. ” Hmang rei hran lo, a tlangpui in darkar 1 atang a darkar 3 vel hi ka hmang thin a, mahse Ni thum hnu vel a rawn lam turin ka ti thin, chu ti lo chu an ngaih a tha lo” zu ti tlat a. Mak thei ngei mai. Hei hi a ni style ngai put put lo chhuahna hnar chu.

    Report this comment

  7. 7
    Rema pa Says:

    Kei chu ka hmuh ve dan chuan musician te ai mah in Sound engineer tha kan ma mawh zawk em tih hi ka ngaih dan ani. Mizo recording hi chu a ri hi a hnawk tlat in ka hre thin. Kan hla hian kal dan bik a nei a Idea thar a awm lo tih chu ka tawm pui khawp mai. Mizo zung a style thar rawn chhep chhuak tu te zingah chuan Lallianmawia Pachuau. tih loh ah chuan Thanga Jongte ani deuh mai tih loh chu style thar han ti chhuak em em pawh kan neih loh hi

    Report this comment

  8. 8
    hp.swing Says:

    Mizo hla hrim hrim hian style bik chu a nei a lawm mahse a music hi chu style hrang hrang in a tih theih. Entir nan, Blues hla rau rau ah poh blues scale in ang lo
    leh modes hmn dan a zir in a style a hrang kan ti mai ang chu. Tiang hian Mizo style poh hi a tih theih ang ka ring tlat a ni. Tang deuh ilang chuan

    Report this comment

  9. 9
    adelfos Says:

    Music kalhmang kan man chak viau va, kan ngaihthlak atang ringawt paw’n tam tak chuan an tih ang chiahin kan zutin kan tum thiam mai. Mahse talented tak tak an awm nual laiin a nawlpui hi chuan creativity kan nei lo. Music “ziak leh chhiar thiam” kan awm mang loh avangin kan music in tawp chin a nei fo. Heti ringawt chuan rual khum a har ang.

    Musical instrument play theih kan nei tlem a; guitar, drums, keyboard, tunhnai deuhvah harmonica a ni deuh tlawng mai. Saxophone, trumpet leh violin mawi taka khawih thei te hi kan va la awm lo em! Orchestra chu sawi loh jazz ensemble pakhat pawh kan la nei lo a ni si a. Full size orchestra kan la hlat deuh a nih pawhin chamber orchestra te tal hi chu neih ve theih hlan a va nghahhlelhawm em! Kan ngaihven lam ni se chuan ti thei chu kan awm ang maw le!

    Recording lamah chuan kan hmabak ngahzia hi sawi thiam a har. Electronic keyboard music awmsa in music track kan siam tlangpui a (tunhnai deuhvah intro, interlude… vela guitar, harmonica, etc. thun luh kan ching ta), voice recording pawh hard disc kan hmang vek a, a ri a fiah fai a, mahse ‘soft’ nalh tak kha a chhuak mawh em em. Sound mixing pawh chutiang deuh tho chu a ni tlangpuiin ka hria. Hmanraw changtlung leh engineer tha kan mamawhna a sang khawp mai… te ka’n ti ve ta duah a nih chu, a hre thiam ve ang zia zangin :-)

    Report this comment

  10. 10
    H.Vangchhia Says:

    Ka ziak ngun tawh, recording studio nei te pawh ka hrilh/rawn ve zeuh2 tawh…sum an hmuh theih tho si avang hian musician tam an hire ngamlo a ni berin ka hria. Mizo music changkan aiin an mahni pocket midang ang bawkin an ngai pawimawh zawk tlat.

    In sawi kha a dik chiah a ni..Mizo hla reng reng hi a in ang vek..a kalphung danglam a awm hran miahlo nia…Nunui’n Dolly Parton hla a sak kha chu ka ngaihthlak tir a copy chhawng te pawh an awm (sap ho)…tin unaupa Hmingpuia guitar solo album pawh kha thiam an ti…mahse kan zaithiam dang te hi vawi khat ka ngaihthlak tir tawh hlawm a, ka zak tawh tih nawn leh atan chuan…” too slow..makes me wanna sleep” an tih bak ah…hian tinge keyboard chauh intrument an hman an ti a..chi tahw loh tlat. Keyboards drum. keyboard bass ….hahahahaha ka tai ka tai a nih chu a….kareoke (spell!!) nghal loh a…Sailova te ho concert/kareoke pawh tih tawh nak lai a.

    Report this comment

  11. 11
    Zorun Says:

    Heng te hi kan musician leh artise te beidawnna a ni fo a. Miin professional tur tak taka a beih dawnin kan Mizo market nen hi chuan a har sa em a ni. Kan zaithiam lar em em te pawhin an album hralh chhuah atangin car thar nalh tak an lei hleithei tlat lo. Hei hian an hlawhpui vak loh zia a tichiang a ni. Thenkhat tihfuh vak lo phei chuan an chawi belh hial thin a ni. Chutiang bawkin lehkhabu siam te pawh kan market zim avang bawkin phur thamna khawp leh eizawnna khawpin tih a harsa fo. Heng te avang hian a lawm, Mizo hnahthlak zawng zawng te hi insuihkhawma, Tawng khat hman tlan a tulna em em chu ni. Kan vaiin millions 4 vel daih kan ni..an ti thin si a.

    Sountrack thuah chuan, ka hne hluah hluah a ni. Concert nei inti thenkhat te pawhin CD ah an rimawi an khung vek mai a, an play back leh mai thin a. MIpui lam lahin a music lam kan hrechang tawhlo a ni mai thei e. kan lampui dual dual thei tho zel a. Music ah hian kan lo duhtui lo hle pawh a ni mai thei e. Hnam changkang zawk leh thiam zawk te tihdan lo ang takin kan ti ve rih a ni berin ka hria.

    Chutihrualin kan recording system leh PA system vel hian duhthu a sam zan lo bawk a ni thei a. Live a hman chi leh recording lama hman chi hi a hrang diah a. Kan sum involve hian a la tlin chiahlo a ni mai thei. Drums ri phei chu nalh taka record chhuak thei kan la awm mang lo. Tin, bass guitar ri pawh a dik hlei thei lo. Heng te hi kan recording la tet vang nge ni ang a, kan sound engineer te thiam loh tih pawh hriat a har a ni. Heng avang hian mi tam tak chuan keyboard atanga programming mai hi an thlan phah pawh a ni mai thei. Ka hriatsual loh chuan Monalisa vanglai khan 4 tracks chauh a hmang a, khatih lai khan Otto chuan 16 vel a hmang thung a. Mahse, monalisa record kha a fiah fel zawk fo thin a. Mahse, instrument ri erawh otto a tluklo thungin ka hria.

    Tunah hian kan recording tharte hian Tracks 24 te an hmang ve tawh e, an ti a. Tak tak ni maw, chutiang te a nih chuan nalh taka record chhuah ve tawh awm tak chu a ni. A nih loh chuan, kan khawl hman kan hrechiang lo a ni thei bawk ang. Miin a tha an tih kan lo lei a, kan lo hman ve ngawt te a nih chuan khawih thiam a har khawp ang. A zira zir chhuah te pawh a ngai ngeiin ka ring. Motor khalh thiam ro ro pawh a chhe lai leh a ri dik lo lai hre chat chata, khawih thiam mi chu khalh thiam ve ringawt ai chuan a hman tlak fo ngei ang.

    Report this comment

  12. 12
    kanidari Says:

    helai chu a va sei hlawm ve…sincere deuh ho an ni maw….

    Report this comment

  13. 13
    chabetkaia Says:

    Zoram rimawi khawvel Sumdawnna hi ala te nau em a, producer te musician te leh Artist te ngei ngei tan pawh eizawnna tlak tak tak (in nghah ngamna) ala ni lem lo tih chu kan hre threuh a, Hemi zauh leh zualnan chuan Zorun sawi ang khian in zawmkhawm hi pawimawh berte zinga mi ani in ka hre ve.

    Tin, chumi piahah chuan Mizo trawng ngawr ngawr nilovin, Khawvel trawng(English) te nen pawh kan in hlat tir lutuk lo hi a trul ve in ka ring. Mizoram mipui leh ram chhung ngawr ngawr belhchhana album kan siam chuan a marketting lam chu eng tham mah anilo, chuvangin Mizoram pawn kan aim tel ve hi a trul ve in ka hre mai mai thrin..

    Report this comment

  14. 14
    SiLent_Man Says:

    Lehlamah… pop star lar deuh deuh pawh hian an music hi an sequence nasa ve tho a nia. mhs sequencing lamah an turu leh law law a. Christina Aguilera album hmasa bera a music te kha KORG Triton a siam deuh vek a nia… Triton nei chu Aizawlah pawh an tam tawh ltk, mhs Aquilera-i sound ang chu ala chhuak thei lemlo.

    Tin soft synth leh sample player tih neuh neuh te hi tha tak a tam khop mai. musician hire tur kan la awm miau si lova tih ngaihna vak a awm rihlo a ni. awm pawh nise a cost leh market ngaihtuahin a tihchi em em lo maithei

    Report this comment

  15. 15
    hp.swing Says:

    tin, keybord kan tih hi synth a ni zawk an ti. kan lam dik hma chu kan thiam lo ang an ti

    Report this comment

  16. 16
    spikey Says:

    mizo hian limitation kan nei emaw ni le hi a tih theih, thil reng reng hi kan thiam chak a mahse ka thiam zo/kim lo thin. Tih leh uar hi kan ti hluai a(thu thar ani lem lo) chuan kan ti chhunzawm leh peih lo bok thin nen. Music lam ngawr ngawr ah pawh hian a ni kher lo ang..kan thiamna hi khawvel pum huapa thiamna ka nei thei tih hi hre reng in thlen san zel leh duh tawk lo in i thrang zel ang u..

    Report this comment

Leave a Reply

You must be logged in to post a comment.