Nghilh Ni Reng Ka Nei Lovang

February 29th, 2008 2:57 am by zakzumi

Theihnghilh tir min tum mahse, a theih loh. Lo theih pawh nise ka theihnghilh phal lo. Mi pangngai te ang thovin lunglenna leh hriatrengna ka nei ve a nih hi. A sakhmel leh kimtlangah midang tan hlu lo teh mahse la ka tan chuan lunghlu sen mi aia hlu a ni a sin. Ka nau, ka nau neihchhun ka hmangaih ka nau a ni miau a lawm le.

Kha mi ni kha thleng lo se emaw khami hun kha bawh pelh theih se tih duh mah ila theih miau si hek lo le. Khuanun a ruat hun zu ni miauva. Kha mi ni tak kha chu aw! Hnathawka hlim taka ka awm laia ‘i nau a dam lo, tia min hrilh tu aw chu ngaihno a bei lovin a va lungchhiatthlak lawi si em ! Ka tan hriat tul si, hriat hrehawm bawk si a va ni chiang tak em ! Hmanhmawh takin ka hmangaih te lenna, leia ka chawlhhahdamna run chu ka pan a, (hmanhmawh tur in ka thu hriat chuan min tur si).

Hmangaih te an dam loh chuan hmangaihtu a dam thei lo a ni. In ka han thleng a, kan In ruak ka tiha kim lo ka tih zia te kha aw ! Kan neih bungbel, thutthleng etc. te chu an lo awm reng a, mahse kan In chu ruak ka ti tlat. Ka farnuin thlaphang tak leh beidawng taka thu min hrilh lai te kha aw ! Ka nau neihchhun, a natna avanga damna rawn an belh thu te ka han hria chu ka va han hamhaih teh lul em !! A biak theih loh tih thu an sawi phei chu ka tan hian thudang dengkhawng leh thu lung-chiatthlak a va ni em ! Min kohna aw pawn a la kiansan hla awm si lova. Nimin mai a la ni si. mahse tunah chuan hmanlai an chang zo ta maw ?

Damdawii Ina ka va luh a, ka nau, ka hmangaih hmel tak kha, engatinge tlangval tha chak lai si kha putar hmel mai a put tak chu le. A sakhminga ka koh pawh chuan min chhang thei mawlh lo, khua a tlai zel a, khua a thim ta tihah chuan he lai rethei te leh lungngai fate awmna chhuansanin lui ral ram mawiah mkin lo nghak turin min kalsan ta a ni.

Hun kha leh chen kan lo lengin rawn kan bel tlangin laikhum kan zal dun a, mahse, tunah zawng mumang ang mai a lo niin hmanlai an chang zo ta maw ? Hmanah chuan hlim ten kan leng za thin, tunah mual min lo liamsan ta a, mual min liamsan hi ka ring thei lo. I sakhmel tawn tur reng awm si lo, nang ngaiin tapin kan rum i lenrual unau zawng te pial leiah riahrun min rem san, kanphal thei lo. I lenrual ten i hlimthla kan bel a, mahse, awmzia reng a awm tawh si lo.

Engvanginnge khuanu hian he thihna hi a lo siam chu aw ! Hmangaih te min thentirtu hi hmangaih Pathian a ni thei angem le. Mahse kan thatna tura min thawhsaktu a ni lawi si a le. He laiah hian inthen thin mah ila kawngkhar mawi an hawn hunah chuan hlim ten kan intawkkhawm leh anga, Beramno hliam hnu kan fak tawh dawn a ni.

Ka hun leh ni te ka dawnkir a,
Kan hlim lai nite ka chhui kir a,
A va reilo em, run kan nghah lai nite,
Hmanlai an chang zo ta mai maw,
A va rei lo em , hlim lai hun te,
Koh kir thei se au kir leh ka nuam,
Mahse tunah zawng mual i liam ta maw,
A van na em ka phal lo che
Lo kir rawh, lo kir leh rawh
I chun nu, zuapa, unau zawng te`n,
Ka phal lo che Mam lo kir leh rawh.

Similar Posts:

Recent Posts:

17 Responses to “Nghilh Ni Reng Ka Nei Lovang”

  1. 1
    nasty Says:

    Ka van khawngaih tak che, mithhi ngaih hi chu a hreom e,lung hi a van leng tak

    Report this comment

  2. 2
    H.Vangchhia Says:

    Ka chhiar kher chu le, ka van in chhir mai mai…:((

    Report this comment

  3. 3
    Burbura Says:

    Lusunna leh thihna hi zawng la tawk lo ten pawn kan tawh theuh tur a ni si. Keipawh tlem ka’n phawrh ve teh ang.

    An awm tawh lo, he khawvelah hian an awm ve tawh lo, a rehin an reh hlen vawng vawng mai.
    Hmanah fiam thu kan thawha hlim taka a nui laite kha aw, kan inkawma a ti ti ve barh barh thina, thil dang tihpah te khan a zai ve rat rat thin asin. Saw tilai darthlalak hmaah te sawn a dinga lungawi takin a inena a inchei ve thian tak kha a nia. He pheikhawkte hi bunin chhuatdungahte hian a kal thina, a ke hniakte chu an nawtreh leh zo tawh bawk si. Hmanah khan he thutthlenga ka thut laiin ka hma banphak maiah hian a rawn dinga, tunah ka han bana boruak mai lo chu khawihtur a awm tawh si lo. A hming lamin han koh vak mai ka nap mange, mahse min chhangtur a awm chuang si lo. A ni, a awm tawh lo, he khawvelah hian hmuhtur a awm leh ngai dawn tawh lo, a ral tawh, engtikah mah a rawn let tawh dawn lo, mahse ka thinlung chhungah chuan a awm. Heng hmanrua leh thawmhnaw te hi inbelin, a lo leklam ve thin tak kha a ni a. Tunah zawng, hmanah khan he khawvelah i lo awm ve tawh thin a ni tih min hriattirtu leh mittui ko chhuaktu mai an chang zo ta si.
    Nangin min vui liam a nih si loh chuan keiin ka vuiliam che a ngai ta si a. Thlanmual kan pan lai khan i sak ruang rial anga dai chu a la awm ve ngei a, mahse kan haw lamah chuan i awm ve tawh lo, piallei thim chhungah chhil hnanin i awm ta. Mihringin kan chan hi a va mak em, he taksa kan duh leh kan duat em em hi lei hnuaia phum ral mai mai tur lek maw lo ni a. Mahse thlarau erawh a ral lo vang, chu chauh chu ka beiseina awm chhun a ni, nang nen intawng leh tur hian. Au au che mah ila i lo kir leh tawh dawn si lo, keimah zawk hi ka la rawn kal ve anga, chutih hunah chuan rauthlain min lo hmuak la, hlim ten kan leng dun leh dawn nia.

    Report this comment

  4. 4
    chabetkaia Says:

    :(((

    Report this comment

  5. 5
    T_taichiata Says:

    chhingmittui……

    Report this comment

  6. 6
    danga Says:

    Aw….!! Kei ngei pawh hian hetiang deuh hi ka tawng tawh alawm, a na thei ngawih ngawih a sin. He laiah hian zawng kan duh angin kan awm lova, kan thuin kan awm lo a nih hi. Tawrh a har thin khawp mai.

    Report this comment

  7. 7
    Veepee Says:

    Lusunna lam chu lo kal kan zawk ila, ziak ve thiam chiah lo mah ila tlem kan sawi ve teh ang. A hnuai a hla thu khi a tluang thra in a in phaman nalh khawp in ka hria. A tlar lina “Hmanlai an chang zo ta mai maw” tih ah khian ‘mai’ tih khi han paih leh se chuan nalh famkim leh zual ang mawle te ka lo ti mai mai a. Tin a chunga airticle ni pah deuh bawk pawh khi thra ka ti khawp mai, ‘Rawn’ tih khi ‘run’ tih tur ni em le? te ka lo ti bawk a. Heitang lo lam pawh hi ziak zel la ka ti khawp mai. Thuziak reng reng hi thu tluangtlam deuh hman tam pawh hi a pawi lem lo chuan ka hria, a chhan chu thu un hman kan tum lutuk na lamah kan thuziak inphaman dan a ti ulh duh in ka hria. Khang ka rawn sawi te kha, ka rawn khei ni lovin ka lo thlir dan a thra lehzual zawk tur ka rawn thawh ve mai ania. Keep up the good work.

    Nia…lusun hi a na hian ka ring thrin. Pi leh pu te chu sun tawh mah ila, a natna ka la pawh pha tak tak lo. Pianpui unau, leh nu leh pa te ngat han chan chu ka ngaihtuah pawh hian ka phal thei lo. Tawng thu chhe lovah lo thleng ta se kan suangtuahna ai hian a nat ngei pawh ka ring. Nupui pasal leh ngaihzawng te pawh chutiang zelin. Upa ten nupui pasal in sun ngat phei chu dar leh lam sah thlak ai pawhin a na zawk an ti. Kan hmangaih te khawvelah kan hmu leh tawh dawn lo tih hriat chuan a khawhar thlakin a lungchhiat thlak viau ang le. Chuvang chuan a la dam ho te hian kan vanneih zia inhria in inhmangaih tawna induat viau mai tur niin ka hria.

    Report this comment

  8. 8
    danga Says:

    Ni e, thuziak reng reng hi tluangtlam, hriatthiam awlsam tak ni thei sela, a tha khawp mai. zakzumi thu ziak hi a ngaihnawm viau mai a, amaherawhchu, hlim lai hun te ti lovin, hlim lai ni te tih ni zawk sela a tluangtlamin chhiar a nuam zawk ngei ang. Tin, Damdawiina ka va luh a, tih aiah Damdawiinah ka va lut a, tiin a hnua a thu khi siamtha leh sela, a tluangtlam nalh zaih ang a, a inpha man zawk ngei ang.

    Report this comment

  9. 9
    father_sphinx Says:

    eh khai a… nguai nguai mai thin a. lung a ti chhe rum rum alawm le…

    Report this comment

  10. 10
    chepahakhata Says:

    Ka pa ka lo sun ve tawh a, ka hriatthiam pui a che u!! He lei hi zawng tah lah hathialna, kan vahvaihna mai a nia. Vanah kuta sak loh chatuanram mawiah kan la in tawng ho ang chu.

    Report this comment

  11. 11
    keimah Says:

    “Pathian thlamuanna, rilru reng reng hriat sen loh” (Phil.4:7) kha, lusunna lo tawk ve tawh zawng zawngte ka duhsak a che u.

    Report this comment

  12. 12
    LiveNletLive Says:

    H.Vangchhia comment ka chhiar a ka duhtawk der mai… chhiar a inchhir ve aiin chhiar lo hian awm ila ka inchhir lo zawk ang chu ka tia :-)

    Report this comment

  13. 13
    Fistbone Says:

    Misual.com ka tlawh khat a chhiar tur a tam tawh hle mai a.. He thu hian min khawih hle mai.. Unau 2 lek kan nia, ka nau leh keimah ah ka in chan a, hnuk a khawih mai dawn alawm le..

    Report this comment

  14. 14
    chawnghilh Says:

    Kristaa muhil tawhte KAIHTHAWH LEH (resurrection) hun tur hi Krista rawn kal leh hun chiah a ni dawn tih Bible-in min hrilh chiang kek kawk bawk a; thihna a thlen hian Krista lo kal lehna min ngaih zualtirin, min nghahhlelhtir thin. Lusun khawhar inhnem nan pawh Krista lokal lehna tur BER MAI hian min THLAMUAN DAM HIAI HIAI!

    Report this comment

  15. 15
    lr Says:

    ka van khawngaigmh tak

    Report this comment

  16. 16
    lr Says:

    ka ngaihtuah zong pon mittui a parol thei alom le.kan hmangaih tak te kan chan hi chuan amak letling xok a,awih a har bok si,mumang ni tlatin kan hria a,a tak ngei ani bok si,ngaihtha tak a han pom cu har tak a ni.

    Report this comment

  17. 17
    ÄÅÌÎÍÒÀÆ ÄÎÌÀ ÖÅÍÀ Says:

    ÄÅÌÎÍÒÀÆ ÄÅÐÅÂßÍÍÛÕ ÊÎÍÑÒÐÓÊÖÈÉ…

    minny…

    Report this comment