Mizo Aw Lawrkhawm :: 18th April

April 18th, 2007 1:33 pm by narzhoc

Lawngtlai-ah Bomb A Puak : Hawla Thah Tumna A Ni – MPCC

Aizawl, April 18 : Nimin zing dar 2:00 vel khan Lawngtlai DC Office bulah bomb chak tak a puak a,tumah thi leh hliam an awm lo a, bungrua tihchhiat pawh a nei lo. He bomb puak hi geletine nia sawi a ni a, Lawngtlai SP chuan bomb puak hi geletine a ni tih sawiin, a tlawn pahnih phuar belhbawm niin a sawi. SP chuan a pahnih hian a puak lo niin a sawi. He bomb puak chungchangah hian rinhlelh mi pahnih Lalrinawma s/o Pu C.Thanghluna, Ex-MLA & MDC leh Lalawmpuia, Thingkah man an ni a, Lawngtlai Police Station-ah kawl mek an ni.

Nimin khan he bomb puak chungchangah hian Congress Bhavan-ah MPCC hruaituten chanchinbumite an kawm a, Senior Vice President Pu R.Lalzirliana, MLA chuan he bomb puak hi Lawngtlaia awm mek MPCC President Pu Lal Thanhawla thah (tihhlum) tumna ngei a ni a ti a, he thil thleng hi an ngaih runthlak thu a sawi. Pu Zira chuan he thil lo thlen dan hi sawiin Pu Hawla hi April ni 13 khan Mara Autonomous District Council-a party pawimawhte tiin a kal a, thil pawimawhte a tihfel hnu-ah April ni 16 khan Lawngtlai a thleng a. Hetah hian Lai Autonomous District Council, thiat si lova suspend mek, sawrkarna siam tura politics virvel lai a ni a, Pu Hawla pawh hian thil pawimawh tihtur neia kal a ni a ti. Pu Zira chuan LADC-ah hian sawrkarna siam tumin state-a ruling party mite pawh an awm niin a sawi.

Pu Zira chuan April ni 16 zan dar 10:30 velah Pu Hawla beih (attack) tumna a awmin Pu C.Thanghluna inah bomb an buatsaih a ni tih hriat a ni a, he thu hriat a nih veleh hian Congress Thalaite chuan an beng an chhi ve ta nghal, Police-te an hriattir a, a rukin an inpunkhawm ve ta a ni a ti. Pu Zira chuan Power Department hriattirin Tourist Lodge Complex leh a chhehvelte an tieng vek a niin a sawi a. Chutianga duty an awm lai chuan nimin zing dar 2:00 velah khan motor bike sen No.MZ 02 5584 ( Pu C.Thanghluna fapa upa zawk Patea ta) chuan Pu Hawla riahna Tourist Lodge hi a pan a, mahse, Tourist Lodge chu a lo en em avang leh duty an awm tih an hriat avangin thleng ngam lovin a thlanga DC Office leh Tourist Lodge peng thuam laiah chuan an bike chu an dah ta a ni a ti. Pu Zira chuan heng a sawite hi mit ngeia hmutute sawi dan niin a sawi.

Pu Zira chuan an President Pu Hawla beih a, thah tum ngei nia an ngaihte thiltih dan hi an dem tawpkhawk a ni tih a sawi a, hetiang thiltih hi inchona tenawm a ni a ti. Congress chuan hetianga tharum leh ralthuam hmanga inepna hi tenawm an ti a ni tih a sawi a. Mizoram Assembly House hnuhnung bera an hlauhthawn thu an lo sawi tawh thin “Tharum hmanga thil tih hi i sim tawh ang u” tia a lo ngenna chu a zual zel niin a lang a ti. Pu Zira cuan he thil lo thleng hi Mizorama bomb tipuak thintute thiltih a nih ngei an rin thu an sawi a. Mizoram Assembly an thil lo sawi tawh leh tun lai thil thleng chu Mizoram mipuiten an ngaihtuah chian ngai a tih thu a sawi.

Chhattisgarh Mizo IR Bn. Mualpho

Chhattisgarh-a Mizo IR Battalion awmte chuan hming chhiatna an tawk mek a, pawngsual thu leh bawng phil chungchangah a ni. Dantewada District Collector hnena Dhuril thingtlang mi 48 te leh Bhagat Kunjam Sarpanch-ten an hming ziaka lehkha an thehluhah chuan Bhansi Police Camp-a awm Mizo battalion chuan an phalna leh an hriatna lovin an bawngte an philsak a, an kelte pawh an philsak bawk.Hei hian rilru lam leh economic lamah harsatna a siamsak avangin DC chu heng an harsatna hi sutliansak turin an ngen a ni.
He an lehkha hi Commandant, Mizo Battalion, Sukna leh SP, Dantewada leh Police Officer, Bhansi hnenah pawh a copy an pe a ni.

Zoramthanga’n Solfa A Thiam Lo – MPCY

Chief Minister leh MNF President Pu Zoramthanga’n kar kal ta zirtawpnia Thenzawl Community Hall-a MNF zawm tharte a lawmluhnaa thu a sawinaah Mizoram Assembly-a sawrkar rintawk lohna sawiho chungchang sawi chhuak a, ‘Pu Lalduhoma’n hla ki a la sang lutuk a, zawmpui tur an awm loh avangin Lal tawngtainain kan bang rual ta mai a ni’ a ti nia sawi chu chhangin MPC Youth chuan Pu Zoramthanga hian a bass thum ham ham dawn emaw an lo tih laiin a solfa thiam lo lutuk chuan a ki mil lo leh a thluk pawh hre uk lovin a vuakzat pawh hre bawk lovin, soprano solfa hmangin a bass ta ret ret mai a, sakpui theih lohin an bang darh ta zawk a ni an ti. Nimin khan press release chhuahin MPCY chuan Pu Zoramthanga chu a sak tur part tal a ki dik nen lo thiam ve awm tak a ni a, a thusawite kha ring tak, mawina nei miah lo ang a ni an ti a, tin chhe vuak ang vel a ni an tihsak.

Mahni Duhthua Bo MDC

Lawngtlai Autonomous District Council member (MDC) Pu Vandaidailova leh MDC dang an bo nia sawi chu amah duhthua bibo nia sawi a ni. Hemi chungchang hi nimin khan chanchinbumite hnenah sawiin MPCC Senior Vice President Pu R.Lalzirliana chuan an tana kidnap hlauhawm loh tur hunah chuan a lo chhuak ve mai turah an ngaih thu a sawi. Pu Vandailova hi a ina licence nei lo silai man chungchangah police-ten thubuai an siamsak a, man tur a ni a, mahse, magistrate hnen atangin man hmaa bail lawkna (anticipatory bail) a la tawh niin hriat a ni.

Civil Pensioners Khawmpui

Vawiin dar 1;30 a.m. atangin Mizoram Civil Pensioners Association chuan Synod Conference Centre, Mission Vengah General Assembly vawi 33-na an nei dawn a, RD Minister Pu Aichhinga khual lian a ni ang. Synod Conference Centre hi an siamthat dawn avangin May thla atangin hman theih a ni dawn lo a ni.

Seminar Changkang

Mizoram University leh Maulana Abdul Kalam Azad Institute of Asian Studies, Kolkata chuan naktuk leh a tuk leh dar 9:30 a.m. atangin I&PR Conference Hall-ah ram pum huap Seminar an buatsaih a, an thupui chu “Reexmaining our vision for in accessible : Dynamics and Issues of Development in North East India” tih a ni a, pawl leh mi bik tlem te an sawm.

MESA General Conference

Naktuk leh naktip hian dar 9:30 a.m. atangin Mizoram Engineering Service Association chuan Multipurpose Hall, Berawtlangah Annual General Conference vawi 27-na an nei dawn a, tel turin member zawng zawng an hriattir. Chief Minister Pu Zoramthanga khual lian a ni ang.

Book of The Year Top Three

Mizo Academy of Letters (MAL)-in kumtina an tih thin dan anga kum khata Mizo tawnga lehkhabu chhuah tha ber “Book of the Year” an thlannaah a thlangtu tur Committee te leh lianin ngun taka a thlir hnuin Book of the Year 2006 ‘top three’-ah Anpai Lanu by H.K.R.Lalbiakliana, La zorma Ram by Revd.Chuauthuama leh Pasalthate Ni Hnuhnung by C.Lalnunchanga an thlang. Heng atang hian Book of The Year an la thleng leh ang.

Aieng Suak Lakah Fimkhur Tur

MNF Gen.Hqrs. Farmers Cell chuan sawrkarin aieng ram pawn lama a lakluh zingah a suak a tel nia hriat a ni tiin a dawngtute chuan ngun taka semna hmunah enfiah a, a chi dik lo chu hnawl ngam tur leh thuneitute hnena report turin an ngen a, aieng suak chi hmuh chhuah a nih chuan a tul anga hma an lak tur thu an sawi.

March Thla Excise Report

YMA lamten tan an la hle chungin March thla khan Excise te chuan zu zuar 235 an man a, zurui 4 an man. Rakzu lirtre 2207.700, zu bilhlai tin 3,577, dawidim kg.10.657, IMFL um 460, beer kum 19, foreign beeer kum 138, zu sakna bel 50 leh motor 9 an man.

Accredited Journalist Tlukpui Group ‘A’

Mizoram sawrkar chuan Accredited Journalist-te an zin leh kal velnaah Mizoram.Circuit/Rest House-ahte state Group A Service anga ngaiin pawimawhna leh facility-te pek an nihna tur thupek a chhuah thar. Accredited journalist-te an hna thawka an zin velnaah heng sawrkar house-ahte an thlen chuan “official on duty” anga pawimawhna pek an ni ang a, pawimawh danga an zin chuan “official not on duty” anga ngaih an ni ang.

IAS Hnenah Judo Blackbelt Pe

Lalrinliana s/o Pu F.Pahnuna, IAS (retd) chu Judo blackbelt pek a ni a, amah hi Uttarakhand state-ah Addl.Secretary a ni.

Police An Dingnghet

Police press hand-out chuan April 20.4.2006-a Berawtlanga Isaac L.Hmar ruang chhar chungchang ngawrh taka chhui zel a ni a ti a, tun hnaiah hemi chungchanga inhnamhnawih leh thil hre tur nia ngaih mi thenkhat man an ni ta chuan police-ten ngun tak leh uluk taka an lo chhuina he tualthahna hi HPC “D” tih a ni tih chu a finfiah a, he tualthahna chungchanga police-ten press hand-out an lo siam tawh kha a nemnghet a ni.

Kawng Zawh Turin Sawm

Zoram Kut Hnathawktu Pawl chuan naktuk dar 11:00 a.m. atanga Aizawl Chanmary atanga kawng zawh an huaihawt turah thingtlang lama kut hnathawktute mai bakah Aizawl khawpui leh hmun hran hrana dikna leh rinawmna duh a, Zoram hi a chhia a ni tih hria a, siamthat duh zawng zawngte tel vek turin an sawm. Nimin khan press release chhuahin Mizorama kut hnathawktute tana central sawrkarin sum tam tham tak a rawn pek, kut hnathawktute hnen thleng a tlem em emna chhan chu eiruk (corruption) vang a ni tih an puang a. Hei vang hian Zorama la thleng ngai lo lungawilohna lantir turin kawng hi an zawh dawn a ni an ti.

Similar Posts:

Recent Posts:

3 Responses to “Mizo Aw Lawrkhawm :: 18th April”

  1. 1
    ThugAngel Says:

    ee Narzhoc-a i ti tha e, lung iva ti leng ve awww….hei i zarah kan beng avar ve vu2 thei a nih hi:P a lawmawm e…lunglen hnemah tal han ti zeuh2 teh Plzz in:)

    Report this comment

  2. 2
    Nirvana Says:

    “Chhattisgarh Mizo IR Bn. Mualpho”

    Let us not blame all of them, even if the accusations were correct which is far from certain. I for one, am still proud of them.
    Have you noticed that since they were deployed, there has been much less news about Naxalite menace in that state ? They are assets to the nation, and remember they risked their lives and limbs to go there.

    Report this comment

  3. 3
    ÄÅÌÎÍÒÀÆ ÇÄÀÍÈÉ ÑÏÁ Says:

    ÑÍÎÑ ×ÀÑÒÈ ÄÎÌÀ…

    minny…

    Report this comment

Leave a Reply

You must be logged in to post a comment.