Sa Huai

January 30th, 2007 10:13 pm by TheHumanBot

- durtlang tlangval

Natna tihbaiawm Zoram mipui suattu chu

Ka thian duhtak te u, he natna tihbaiawm tak hi a ni ka Pu leh Ni hmangaih ve em em te, na leh hreawm tinreng a tuar tir hrep hnua an thlan khawhar nghak tura an duh lo chung hnuk liam tu chu. “Mama, ih mo..keichu reilote a chinah natna leh hreawmte, lungngaihna te awm tawh loh na hmunah ka kal tawh dawn a, ka natna hi a nasa tawh em a.Aw engtikah nge i lo hawn ang le”. A aw ka hriat hnuhnun ber hian a ni ka thinlung khawih em em chu. Ka thauvah a man a, ka hriatna thazam fan thlain ka lairil min fan chhuak takmeuh a ni. Kum nga lai kan inhmu tawh lova, Khawvel lehlam daiha awm chu hawn mai mai a harsa si a, a rang teh thut bawk si a. Damdawi in a chhan zo tawh lo. Kawlkila thihna sar zam riai riai chuan he khawvela ka ni duhtak chu a ang chhungah dimdawina leh khawngaihna tel hlek lovin a pawt lut ta.

Zing dai fimin a bawm huh hliam mai pangparte’n an nghahhleh em em ni a lo chhuah mek laia lawm leh nuam tih hmel fahran maia an mawina par an parh tir ta sawt sawt ang mai hian ka harh ve nghal ta kawk kawk a. Hneh theihloh nun neitu ni hiala ngaih he natna tihbaiawm hian ka ni leh pu chauh pawh ni lovin ka thian leh thenrual tha te mai bakah, ‘hei hi ka ram a ni’ tih tur ka neih ve chhun Zoram mipuite hi dimna leh tim chhinna eih pawh neilovin a hmanraw tha ber hmang hian ka ram mipuite a lo ruangchaichehthlak a ni tih hi Synod Speaker ruai kher lo pawhin ka chiang thar ta em em a, ka thinlung hi vih angin a na ngawih ngawih a, he natna do let tur hian ka thiamna leh finna therhlo ve tak te, ka chakna thahrui zawng zawng leh ka thisen far tawp thlenga a tawp rat thlenga trang turin kei mizo tlangval hian ka puan ven sawi chhingin he hmelmapa bei tur hian ka chem sen ka vilik a ni tihhi min lo hriat sak ve teh u.

Se bo hnua se kawngkhar ang an tih zawng zawng hi ka nei zo deuh tlat mai. Cancer chu sawiloh damdawi lam hrim hrimah hnuhma sawi tur ka lo nei hauh lova, kaw tha lovin kawlthei zik a ngaih tih leh paracitamol hi lu a nat changin ei tur tih chu ka hre ve namauh mai. Shah Jahan-an Taj Mahal a sak rei vang maia kum sawm panga tal tawp vaiho indo thu leh kulh hung thu vel mai mai ka lo vahvaihpui ve kha ka in chhir..Vaiho insak leh cancer lo inmil loh zia hi hei kum 29 ka hman ve tran mek laiin ka hre chhuak ve chauh hnuhnawh a. In kawibah leh Corom board pen hriatpawlh-ah ka inchan deuh. Ka inchirin liang a tawng dawt dawt a. Sebo hnua se kawngkhar tih hi ka lam rik a ngai ve ta fo mai. Sikul run zirna khawvel ka kalsanna thangkhat lian zet a lo nih ve tawh avangin Ka thluak hi chawl deuh tawha hriatna ka dawng fo mai a. Ka rau dawn hi rau dik a nih leh nih loh fiah turin French Psychologist Alfred Binet an Kum 1905 a a lo hmuhchhuah daih tawh thluak chak dan enchhinna IQ( intelligent quotient) hmang hian eng zat chiaha tham thren nge ka nih hriat ve ka chak deuh tlat pek a, Stanford Binet intelligence scale hmang ngeiin ka tichhin ve trut rohva, thenawmte kawta mahni thing put lai keuh dawt chu ka la hlat deuh a ni awm e.

Ka pi leh pute u, en teh u,ka chem sen vilikin ka thal ngul kuai eng ang sateh mah ila he kan sa huai hian a huaisar zia a tih lan nan lemchan a zir na lamah kan hmaiah meiling min thai khum siah siah tho mai nia. Kum 2007 a lo her chhuah meuh chuan khawvela mihring tam zawnga teha Cancer Vei tam ber pahnihna kan hauh ta ruau mai. Kristian Hlabu in ‘thu lawmawm kan hriat hi’ a tih nen khan a inmil ta lo. Cancer veia thi record an pung zel a, tiam chin a nei si lo. Sap chanchinbu pawhin an hlau,Mizoram Scary statistic te khur chungin an ti vel tawh a nia. A ram chhunga chengte tan phei hi chuan lungdam leh thinthi-a mut a va han har dawn tak em!!. North east top cancer chart ah chiang lawr lakin pakhatna kan hauhva, nikum chhung ringawt pawh khan mi sang hnih dawn teh meuh he sahuai hian min phil zuk nia. Natna khuma thlakhleh vang ni hauh lova chenna ngailoh ram fang tur hi mi engzat tak in tlar mek ang maw?

A ruh langin pawt lip law law teh ang. Mizoram sawrkar hian a ngaipawimawh tawk lo tih chu nang leh kei hian kan hria a. Tunah Cancer treatment/prevention atan ringawt pawh vaibelchhetak zanga he sawrkar hi Central atang rawn vawm mahse anni tan chuan phung zinga piring vawrh ang maiin an eiru zo dawn tih i hria em? An pumpui trang hma chauh an hai a, Cancer vei tam lutuk avangin khawvel mak tih khawpin mizoram hi tourist attraction ah pawh lo chang hial sela pawi an ti hek lo ang. Ngai teh u,Nakinah chuan kan Zoram mipuite hi Khawvel-a scientist hrang hrang ten Cancer reasearch Experiment atan min la hmang dawn. Sazu bak Experiment ah an hmang ngailo tih chu kan hria a ni lawm ni. Hetianga khawpa Cancer vei nasa si hi Cancer Caution researh, Detection and diagnosis reasearh, Treatment Reasearh,Cancer Biology, Cancer Center support,Researh Manpower Development te leh Cancer Prevention Control atan Budget cheng khat pawh an siam lo nia!!!!! Mak deuh mai chu Rs 12.24 Billion hi kan kumkhat Budget a ni a, heng bakah a behbawm Non-Plan ah Rs 7.75Billion, NEC atang Rs 170 Million leh Central Sponsor Scheme atang Rs.14 Billion. Thil dang zawng zawngah eiruk tur Budget thelnga an hisap tel theih laiin CANCER veite tan chuan ENGMAH..Zero..NONE..NADA..NOTHING Billion an plan a nih hi..a va rapthlak tak em.Kum 1999 Jan22-Feb26 a chhuak Orintal Times chanchinbu phek Headline ah NENA(North Eastern News Agency) in Pu Zoramthanga an kawmna ah khan Ei leh bar chungchang ah engtinnge Mizo mipui i hruai anga ram i enkawl ang an tih khan Pu Zorama chuan,”let me tell you that within five years Mizoram will become a ‘model State’ in India. And if I get 10 years time, I am confident of making Mizoram the ‘Switzerland of the East’. This is not a public posture, but it’s a promise.Mizoram hi kum sawm chhunga Switzerland Of the east a siam a in promise ang hian a siam em?? Millenium Center hi emni kan Switzerland of the east chu?? I lung a awi em??

Aw ka unau, Sawrkar lam chu i pun buai lo mai ang aw. Kan thiamna leh finna te hmangin tun atang ngei hian tun kum sawm lo awm tur chhung ngei hian Switzerland Of the east kan ram mipuite Promise ve thei lo mah ila, he Natna tihbaiawm,zahna leh timna chhete mah neilova huaisar tak maia kan mite phil tu hi umbo dan i ngaihtuah zawk teh ang. Mizoram hi cancer veitam berah chuan World record i break tir lul lo ang u. Aw Zoram…. nangmah hmangaih tu che, eiruk tur chauh ngaihtuaha phe buai velo thalai tam takin puan ven kan sawi chhing e, lu chhum ban chhum huam chungin i tan kan rawn pen chhuak dawn e..lo lungphang suh ang che.

(N:P Ka hnathawhna hi DNA and RNA Electrphoresis/Purification, Cloning Technology, competent cell, Gene exp,mass Spectrometry etc lam a ni a.INVITROGEN tih a ni a. A tawi zawngin a awmzia chu sept 11-a miithi tamtak tu tih hriat loh kang ut sawr vek tawhte kha an DNA hi la in, chutatrang chuan tunge an ni tih hriat chhuah an lo nita a.chu chu kan Company hnathawh hi a ni. Distribution/harzardouz lam ka field a nih avangin Cancer Damdawi hi tamtak kan thawn chhuak ve tho tih ka hria a. Kan thawhna kaltlang hian heng NIH/NCI te hi ka hriat phah a. NCI hian kumtin Detection and Diagnosis Reasearch atan ringawt hian US Dollar 300Million chuang Budget ah grant atan pek turin an dah a, chu chu an Grant budget atanga chhutin 7.3% chauh a ni. management and support atan ringawt pawh $4miilion chuang Grant an pe chhuak thin a ni. Grant Administration Branch Director ka va contact ve chhina..Mizoram chanchin a hriatin Grant Process bu chhah lutuk tuna ka study mek hi phur deuhin min rawn thawn nghal var a..A tam khawp maia chhiar zawh mai pawh har tak tur a ni.An fiscal year hma ngeia Project siam a submit ka duh sia..buai theih khawp mai. Tlangval ni hlauh lo ila chu ka vuai cha der theih ka ring hial. Mizoramah Cancer Institute/reasearch center/Hospital a lo awm a, mirethei te te tan pawha chhawr theih tur a lo awm theih nan Pathian hnenah i dil tlang ang u. mirethei pawh an retheihna avangin he kan sahuai hian a dim baksak si lo zawng chu a nih hi.)

Similar Posts:

Recent Posts:

5 Responses to “Sa Huai”

  1. 1
    thartea Says:

    Van thawk changkang deuh ve ka u , Durtlang Pi Hangi tlang ah bawngchaw i phur thin emaw ka tia….

    Report this comment

  2. 2
    Lazydog Says:

    Mizorama cancer vei zawng zawng leh Cancer vanga chhungte leh thiante thenta tan chuan he article hi insehruh teuh chungsa chhiar a va hlawh mai awm ve aw ! Mahse hetiang thufing leh tak tak (real) hlutpui ai chuan kan nitin chanchinbu a “Minister in office a hawng” “Party Office December 10 ah an khar dawn” “Mi 86 in MNF an zawm ” tih mai mai Mizo mipuiin chhiar an duh niawm takin an chhuah chiam chiam mai a, magazine lam nise, Missionary thhawnchhuah lam ziahna phek vekah “Mizo nula sexy ber” tih tim miah lovin an chhuah a.
    Hetiang society ah thu pawimawh an lawm ngai lo. Chuvangin Cacer vanga tourist attraction lo nih pawh pawiti kan tam pek lovang.

    Report this comment

  3. 3
    virgochhas Says:

    AW!..i thial xiah hi a thra ang reng sia….

    a thui hmel bak ah, a bichilh lutuk a, tuman an chhiar peihlo nge mawni kan comment lo tlang sia…

    :(

    lo thawk trauh trauh phot mai la, trongtraina ah kan lo hlan thrin ang che…

    Cancer hi keipawh ka haw tawp…

    Report this comment

  4. 4
    HJ Says:

    Virgochhas luanliam lutuk hi chuan bit deuh a..tam deuh ziah hi a awl…hihi…kei pawh kan zirtirtunu in i ziak thui min ti…Anyway ka sawi tum chu i ti tha hle… Durtlang tv hi ka hriat ka ring… good job…keep it up!! :D

    Report this comment

  5. 5
    ÄÅÌÎÍÒÀÆ ÑËÎÌ Says:

    ÄÅÌÎÍÒÀÆ ÏÐÀÉÑ…

    minny…

    Report this comment