Thli leh ruahin thil a tichhiatte

October 23rd, 2006 8:58 pm by father_sphinx

October 21 (Inrinni) tlai dar 5:30 vela Aizawl khawpui leh a chhehvela ruah leh thlipui thawk avangin In 80 vel a chhia a, heng zinga 7 chu luah tlak lohin a chhia a ni.    Thli leh ruah avanga In chhe vekte hi Aizawl DC report-a a lan dan chuan  Kulikawna Lalruala In leh S.R.Tlanghmingliana In, Republic venga Ronghinglova In, Tlangnuam venga Lalhmingliana In leh Lalthansanga In, Thakthing venga Ngurkhama In, Venghnuaia Kawlkhawma In leh College venga H.D.Darthanchunga Inte an ni a.  alremsanga luah chu thliin a len thluk laia awm Vanlalsiamthari leh a fate pahnih chuan hliam na lutuk lo an tuar a. In chhe nasa deuh 68 bakah chhe nasa lo 78 vel a awm bawk.
Veng hrang hranga in chhe zat chu Mission Vengthlangah In 5 leh UPC Biakin, Kulikawnah chenna In 15 leh Anganwadi Centre pakhat, Chaltlangah chenna In 2 leh School leh Indoor Stadium, Republic leh Upper Republic-ah chenna In 12, Ramthar North-ah In 1, Vaivakawn-ah In 1, Tlangnuam ah chenna In 12 leh Presbyterian Biakin 1 leh ICDS Quarter 2, Thakthing-ah In 3, Venghnuai In 4, Tuikhuahtlang In 10, Chamari ah RD Office leh Account & Treasuries Office, Zonuam-ah In 1, Durtlang Leitan-ah In 6 leh College veng leh ITI ah In 3 te an ni a.
In tam tak bakah Thingtlu leh thingzar tliak a tamin Electric, Cable TV leh Telephone hrui chhia a tam hle a, Aizawl khawpui chhung pawh a hnawk hle a ni. Hei bakah hian hriat theih chinah Maubuang leh Phullen-ah te buh a tichhe nasa hle bawk a, Maubuangah chuan in 60 vel buh a tichhiain heng zinga chhungkaw 20 vel chuan buh an la seng miah lo a ni.Veng hrang hrangah hemi zan la la leh a tuk Pathianni khan In chhiate senghawi leh siam that hnatlang neih nghal a ni a, Kohhran thenkhat chuan Pathianni Inkhawm pawh an neilo hial a ni.
Pathianni khan Tuikhuahtlanga Electric line chhia siamtu Lalhmingthanga (23) s/o. Liansua, Electric veng Aizawl chu bana a lawn laiin a chesual a, damdawiin thlenpui anih hmain a boral a ni. Aizawl DC Vanengmawia hovin  AEC H.Lianzela, ADC  Chauhnuna Liansangzuala leh Rita L.Pachuau ten Aizawl-a chhiatna thlenna hmun hrang hrangte an tlawh a, hnatlang thingpui lumna leh tanpuina te an hlan a ni.

Similar Posts:

Recent Posts:

2 Responses to “Thli leh ruahin thil a tichhiatte”

  1. 1
    Anon Says:

    Mizoram hmun dang chanchin hria kan awm em aw? Aizawl chauha thil thleng em ni hei hi? Thanks for any info.

    Report this comment

  2. 2
    SiLent_Man Says:

    Ka hre biklo tih ka rawn tarlang e. Hmun dangah a thlen ve loh ka beisei. A zialo takzet a ni

    Report this comment

Leave a Reply

You must be logged in to post a comment.