mi(sual).com

Pi Lalsangzuali Sailo nghilh loh nan!
H.Vanlalhruaia, Hyderabad

Hman ni khan Pi Lalsangzuali Sailo fapa chu Bangalorea a thih thu hriat a ni tawh a. Hemi hnua lawkah Pi Lalsangzuali chu Mumbai-a inentir a kal lai khan, Hyderabad Mizo thenkhat chuan kan lo tawngtai pui nasa ve hle a. Zirtawp tlai tawngtai inkhawm apiang hian tawngtaipuina kan nei ve ta ziah a ni. Mahse, lei mihringte duhdan leh remruat piah lama thuneitu chuan alo chawlh hahdam tir ta zawk a ni. Pi Lalsangzuali hi mimal taka ui em em na chhan ka nei ve a, amah hriat reng nan ka han sawi ve reng reng teh ang.

Pi Lalsangzuali ka hriatna hmasa ber chu naupang chumchiap lek ka nih lai a, a zai /cassette/album ka nu in min pek tak kha a ni. Khawhar hla leh Kristmas hla/Kum hlui leh kumthar hlate kha a ni. Hetih laia ka hla ngaihthlak ve thin chu Boney M, Lobo leh Pi Lalsangzuali Sailo chiah hi a ni. Chuvangin, ngaihsan namen lovin ka ngaisang thin a. Lalsangzuali Sailo tih hming hrim hrim kha mawi danglam ta hle ni hian ka hre thin. Hetih lai hian ka Pute-a chuan fa hmasa ber tan a fanu a nei ta bawk a. Mizo zingah hi chuan fa tlum ber hming phuah hi tar zawk leh puitling zawkte chanvo a ni deuh ber thin a. Mahse, kei naupang, chumchiap â lutuk mai chuan ka pute fanu hming phuah chu ka hauh ta tlat mai pek a. Ka mi ngaihsan em em hmingchawiin Lalsangzuali Sailo tih ka phuah ta a. Mahse, Sailo hnam a nih ve miau loh avangin, Sailo tih em em erawh a pu tel ta lo. Tichuan, Pi Lalsangzuali Sailo hming chawia ka phuah Lalsangzuali junior chu tunah hian tleirawl a ni ve der tawh a. Pi Lalsangzuali Sailo hian han hmu ngei se ka ti ve mai mai thin.

Pi Lalsangzuali hnenah hian hetiang thu hi ka la hrilh ngai lova. Vawikhat chu ka thianpa Lalawmpuia (s/o R.Biaksanga. Principal, Government Aizawl College) chantuan ram min pan san tum khan a vawikhatna atan mipui karah Pi Lalsangzuali Sailo hmel chu ka hmu ve ta mial a. Mahse, kei rawlthar la zakzum tak mai khan ka va be ngam ta ngang lova. Tun hnuah hian, amah ngaisangtu ka nih thin zia te hi a lamhnai ka hmelhriatte kaltlanga hrilh tura ka tih hian an lo sawi theihnghilh ziah bawk si. Engtik emaw chuan, amah hrim hrim hi hmaichhanah ka hmu ve chhin tur a ni ka ti rilru ve reng a. Tun kum tawp lam December, 2006 hian ka awmna Hyderabad atangin Mizoram ka haw ve theih dawn bakah thianpa L.P Sailo (Switzerland) nen inchhung hnai tak an lo ni bawk nen, amah hmuhna remchang ka nei ngei dawn a. Ka chanchin hi ka hrilh anga, a hlimpui ve phian awm e ka tih mek laiin chatuan ram min pansan ta mai hi pawi ka tih zia hi sawifiah thiam a har hle. Mimal takin ka ui takzet a ni tih hi ka sawifiah thiam dan ber a ni mai awm e.

Tun thleng hian kumhlui thlahna “kumhlui aw ding reng rawh” a tih phei hi chu ka bengah hian la cham ve reng thin. Kum hlui leh kumthar thlahna album hi ka la kawl ve ta zel a. Kumthar ni a, a hla sak ngei ngaihthlak hian kumthar ni hi a chiang zual bik ni hian ka hre thin. Mizo fate zingah, (a bikin Mizo hmeichhe zingah) a ni ang tluka thu leh hla lama thawh hlawk tawh hi an la awm kher awm love. Ropuiliani chanchin a ziah phei kha chu, history lehkhabu tih tlak a ni. Mizo hmeichhiate zingah a hnung zui thei tur mi hi piang chhuak leh tak ang maw! Mizote tan chuan, he “Mizo Nu” ropui zet mai hi theihnghilh phalh chi a ni a ni ngai tawh lovang.

Lalsangzuali Sailo (Zoawi lelte) kan chanta!
by Malsawmdawngliana Lailung

Ni 3. 10.2006 dar sawm pakhat leh chanve a in khawng a ka cell phone chu a ri ral ral a ka thu dawn chu, “Pi. Lalsangzuali Sailo thih thu” a ni mauh mai! Chutiang ang thurawngin min thawng thut chu awih pawh a har lek lek mai. Zonu zinga ka ngaihsan ruk em em ka research lam a min pui theitu ah kalo hual lawk diam tawh, tun thlasik chawlh lai a hmaichhawn a kut thing meuha amah biak kalo rilruk a ni. Chuti teh thut a min han liamsan chu a pawi ka ti hle. Chu mi reilo te ah sms ka dawng leh a, “Pi. Lalsangzuali hospital ah oxygen pek mek a ni a, i tawngtaipui ang u”. “Aw.. duhsaktu leh ngaihsaktu i va han ngah mawlh mawlh em!” kan ti ngawt a. He Hyderabad khawchhungah hian keimah chauh emaw uitu che ka intia, mi tamtak anlo awm a ni, Zoram dung leh vangah phei chuan an va nasa dawn em. Chutia a hnuk te a la chah siloh chuan khawnge bei nge sei run dung … ka thiam ang tawkin Pi. Zualbawihi tan chuan ka dilsak ve ta ngawt a. Amaherawhchu siamtu chuan Ni.4.10.2006 chaw hma lam khan natna te awm tawh lohna hmunah vankhawpuiah chuan zoram awitu Pi. Zualbawihi chu vanzaipawla a tlar hma a ding ngei turin a seng ta a ni.

Ka la hrereng mai he nu ropui tak ka hmuh hmasak ber ni hi kan la naupan zual lai khan kan khua Theiriat Lunglei ah chuan an chhungte lungphunna ah an rawn tel ve a ni. Khatihlai mite hriat a hlawhna ber chu a samsei kha a ni. Nu te’n zan mut awihnan a thawnthu min hrilh Rimenhawihi samsei zia ngaihnawm ti tak a kan ngaihthlak lai vel kha a ni bawk a. Mizo nu ngei mai samsei a tak ram a kan hmu tur chu kan helhhawlh em em a ni. Ute kal tur ngen hlawhtlingin chu nu ropui tak chu en turin kan kal ve a, an thlenna hi Theiriat khua ah pawh a tlangsang lai a ni a, kan awmna atang chuan a hla hle lehnghal a. Kan hmuh duhna chu a nasat em avangin naupang te e ti lo chuan kan theihtawpin a awmna hmun chu kan pan ve a. Chutah a hmun kan han thleng a, lengkhawm hla tamtak kan sak hnu in kan mi hmuhduh chu mi zawng zawng hmuh theih in stoolah hian an din tir a, mipui mit zawng zawng chu amah ah chuan a fu thuap mai a ni. A sam chu a lo sei takzet mai stool a ding chung pawh chuan lei a la hawlh thleng leh nghal a. Kan hmuh phak ah chuan kha ai a ropui kha a awmlo. Chutah hla nalh takin mipui kalkhawm te chu min awi a. Chumi ni chuan kan khua naupang atanga puitling tar thlengin Pi Zualbawihi zunah kan uai a ni ber mai. Hetiang nu ropui hi kan khua tan chuan British mipui te rilru ti tui zotu ‘Diana’ ang kha a ni ngawt mai, khua a chhuahsan hnu karkhat ai a rei mah chu a chanchin chuan khua a luah a ni.

Ania sin, Zion Street chho a Pi. Zualbawihi leh Boney.M zai ri kan hriat loh chuan kan kutpui Krismas pawh a kimzo tawhlo! Pi. Zualbawihin zai a kumhlui a thlah loh chuan kan chhungkua chuan kumthar kan hmuak thiam tawhlo. Ka nu in a ka pa fam tawh a ngaih chang a hnemngaihna ka hriat tawhloh chang pawhin a lunglen hnem thiamtu a ni a. Kei leh ka chhungte tan hi chuan Pi. Zualbawihi hi ava han hlu tak em. Kei chang ka ni hleinem, phai ram leh India ram pawn thleng a Zofa awm te’n Zoram an ngaih chang a an in hnemna ber pawh a zai mawi tak hi a la ni tho. Chuvang chuan a aw ah hian Mizona a awm a, ngaihthlak ringawt pawhin kan Mizona min hriatchhuahtir leh thin. Kan ram hi Globalization-in eng ang pawn min rawn chimin kan zaithiamte’n sap tak maiin min thluk kual san mahse Pi Zualbawihi aw hi chu a danglam chuang ngai lo! Zo awi lelte dik tak a ni.

Bungkawn veng naupang..chumai a nilo Zoram naupang ho hian an ngai em em in ka ring. Gospel Centenary Mizoram kohhran te chuan kan lawm dawn a, khatih lai khan naupangte pawh engemaw ti takin an sahawk ve a, hetiang hun chep ah hian an tan hun a awm ve a ngem le? Sap milianpui pui kan chah chhuak a ziapawl lah chu an thahnem hle leh nghal a, thusawitu pawh tamtak an ni. Chutih karah chuan naupang te pual programme tur buatsaihin naupangte uniform nen a mipui hmachhawn tir thei a ni. Sociologist turu tak a nih phei zawng ka hre hauh lo a, mahse ram leh hnam din chhuahnan chhungkua naupang enkawl tul zia ring tak a tlangaupuitu a ni. Naupang te tak te te an kut leh ke te mi mangang tanpui thei tur a hla hmanga zirtirtu a ni a. Zofate tan chuan Mother Teresa ang mai in a hlu a, nu leh pa neilo te tan hlei hlei hian a va muan awm em.

Thih sual a Green Hospital a a awm lai khan Zofate hmun hrang hrang a mite chuan a dam leh ngei theihnan Siamtu Pathian kan au theuh hlawm a. Zoram tan chuan hetiang ang fachuam han fam ta mai hi hriatthiam a har hle ang. Amaherawhchu a taksa kan bulah awm tawhlo mahse mitin te thinlungah hian ‘Mizo’ tih khawvela ala awm chung hian a reh tawh dawnlo a ni.

Zoram i fachuam fam khawpui a lawi e,
Sai ip puan sin la, luaithli nul rawh,
Mithi khuate u kan uilai chunnu hi zah takin lo hmuak ve rawh u.
Zoram mipui tana channa a ni e.

Similar Posts:

• Vawiinah Pi Zualbawihi lehkhabu leh hlabu
• Pi Lalsangzuali Sailo
• Naupang khawngaihthlak-in chawimawina dawng
• Youth Icon report
• Champhai In Kang

Recent Posts:

• Biakin len zawng?
• Eng Browser nge chak i tih a, i hman thin?
• Friday MusicVideo post :D
• Mual hla kar danah i liam ta a (Ka version ve thung aw)
• Zirna chungchang a tanpuina/thurawn

This entry was posted on Sunday, October 15th, 2006 at 9:27 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.